Wanaosaka uwaziri wamchelewesha JK.

*Sasa kutangaza baraza lake leo au kesho.
*Membe, Tibaijuka wagongana mambo ya nje.

Na Tumaini Makene.

WAKATI Watanzania wakiwa katika kimuhemuhe cha kusubiri baraza jipya la mawaziri, habari zimevuja kuwa mpaka jana ilikuwa imeshindikana kutangazwa kutokana na
mambo kadhaa likiwamo shinikizo la baadhi ya maswahiba wanaoshinikiza wateuliwe katika baraza hilo kwa majaliwa yao kisiasa, hasa urais katika uchaguzi wa mwaka 2015.

Habari hizo pia zimezidi kutaja majina ya watu yenye uwezekano wa kuteuliwa katika baraza hilo, likiwa na sura kadhaa mpya, huku kukiwa na uwezekano mkubwa wa Chama Cha Wananchi (CUF) kupata nafasi katika baraza hilo.

Habari kutoka vyanzo vya kuaminika katika duru za kisiasa, hasa serikalini zimelithibitishia Majira kuwa marafiki wa Rais Kikwete bado wanatia shinikizo wakitaka wawemo katika baraza jipya la mawaziri kwani kinyume chake itakuwa ni sawa na kutangaziwa maafa katika harakati zao za kusaka madaraka ya juu kisiasa.

Imezidi kuelezwa kuwa mantiki ya shinikizo hilo la maswahiba wa rais kuwemo katika baraza hilo, inasababishwa na ukweli kuwa itawapatia nafasi ya kushikilia madaraka ambayo yatawafanya kuwa karibu na wananchi, huku wakiendeleza mikakati yao ya kujiimarisha kisiasa, kwa majaliwa ya baadaye, hasa wakati wa uchaguzi mkuu wa ndani ya Chama Cha Mapinduzi (CCM) na uchaguzi mkuu wa 2015.

Habari hizo zilisema kuwa maswahiba hao wanashinikiza uteuzi wao au wa watu wao wengine wa karibu katika mikakati yao ya kisiasa, ikidaiwa kuwa wamesema wakikosekana katika baraza hilo na serikalini kwa ujumla itakuwa ni sawa na kutangaziwa mwisho wa zama zao za kisiasa Tanzania na hasa ndoto zao za kushika madaraka makubwa nchini.

Imeelezwa kuwa hofu ya kugombania kuwemo katika baraza la mawaziri inatokana na kuwa mwaka 2015 kutakuwa na mabadiliko ya uongozi ndani ya CCM, ambapo mgombea urais mpya atakuwa anachaguliwa, hivyo washinikizaji wamedaiwa kusema ni bora wakaingia na mtu ambaye wanamfahamu kuliko aingie mtu ambaye si 'mwenzao' kwani itakuwa hatari kwa mstakabali wa maisha yao kisiasa.

"Mpaka sasa baraza halijatangazwa kwa sababu akina...(anataja majina yao washinikizaji) wanataka wateuliwe katika baraza la mawaziri, wanasema kuwa wasipoteuliwa ni sawa na kumaliza mbio zao za kisiasa, wanalalamika kabisa kuwa watakuwa wametangaziwa mwisho wao wa kisiasa hasa majaliwa yao katika uchaguzi mkuu wa mwaka 2015.

"Wanasema kuwa mwaka 2015 ni mwaka wa change of guard (mabadiliko makubwa ya uongozi) hasa katika nafasi ya urais, kwa sababu atakuwa anaingia rais mpya, hivyo hawajui nani atakayeingia, hivyo wakitoswa sasa hivi wanaona kuwa itakuwa ni hatari kwao...wanataka wawemo serikalini ili kujipanga," alisema mmoja wa wapashaji habari wetu.

Habari hizo zilisema kuwa ingawa kuna uwezekano mkubwa wa Bw. Bernard Membe kurudi katika Wizara ya Mambo ya Nje na Ushirikiano wa Kimataifa, kuna shinikizo kubwa la watu wanaosemwa kuwa karibu na taasisi ya urais, wakitaka asirudishwe katika nafasi hiyo kwani atakuwa tishio kwani atakuwa na mazingira mazuri ya 'kuelekea' ikulu, ambapo amekuwa akitajwa kuwa ni kati ya watu wenye matamanio ya kuwania kiti hicho ndani ya CCM mwaka 2015.

Lakini pia mbali na shinikizo la kutaka Bw. Membe asirudishwe katika nafasi hiyo ili kuyumbisha kile kinachoitwa mikakati yake ya urais, imeelezwa kuwa uwaziri wa wizara hiyo una changamoto kubwa kwani Rais Kikwete anataka kuendeleza imani yake kwa wanawake katika wizara hiyo kama alivyomteua Bi. Asha-Rose Migiro, kabla hajateuliwa kuwa Naibu Katibu Mkuu wa Umoja wa Mataifa (UN).

"Wengine wanaona kuwa nafasi hiyo inamstahili zaidi Profesa Tibaijuka (Anna) kwani inadaiwa kuwa aliitwa kurudi nyumbani agombee ili atumike katika nafasi hiyo, lakini tatizo linakuja kuwa ukimwondoa Membe hapo unaonekana kabisa kuwa umekatilia mbali mipango yake, lakini pia unampeleka wapi...labda wizara ya mambo ya ndani alikokuwa kabla...lakini pia wengine wanataka Prof. Tibaijuka apewe wizara inayohusika na makazi, kwani ndiyo hasa fani yake aliyokuwa akiifanyia kazi huko UN, ashughulikie tatizo la makazi holela na migogoro ya ardhi.

"Wizara ya Afya haina tatizo Prof. Mwakyusa (David) atarudi, akina Makamba (January), watakuwa junior ministers tu (naibu waziri) lakini pia kuna uwezekano CUF watapata nafasi...hii ni kutokana na makubaliano ya mwafaka huko Zanzibar, majina yanayotajwa hapa ni Hamad Rashid Mohamed na Habib Mnyaa...lakini hapa pia kuna issues (masuala) mbili zinatatiza...inahojiwa.

"Wizara nyingine yenye mgogoro ni wizara ya masuala ya fedha na uchumi, hapa alisemwa Dkt. Cyril Chami, lakini anaonekana kuwa ni man of principles (mtu mwenye msimamo) hawezi kupelekeshwa...pale wanataka mtu ambaye wakubwa wakisema wanataka hiki anafuata tu bila kuhoji, hivyo yeye anafikiriwa kupewa uwaziri kamili wa Viwanda, Biashara na Masoko, ili hapo fedha atafutwe mwingine...labda Meghji (Zakia Hamdan).

Wengine waliotajwa ni pamoja na Prof. Makame Mnyaa Mbarawa aliyeteuliwa ubunge hivi karibuni na Rais Kikwete ubunge, ambaye ameelezwa kuwa anaweza kupewa wizaya ya masuala ya elimu, huku Bi. Zakhia Meghji akiendelea kutajwa pia.