Wadaiwa kuchanga fedha kumwangusha ngombea.

Na Benjamin Masese, Rorya

WAKATI mchakato wa kuwatafuta mameya na wenyeviti wa halmashauri mbalimbali ukianza nchini kote, baadhi ya watumishi wa halmashauri ya Wilaya ya Rorya wanadaiwa kuchanga fedha kwa
ajili ya kumchangia mmoja ya wagombea wa nafasi hiyo kama mkakati wa kukabiliana na mwenyekiti aliyemaliza muda wake ambaye pia anatetea nafasi hiyo.

Habari kutoka katika moja ya vikao vya kukusanya michango hiyo ambayo vimekuwa vikifanyika katika mji mdogo wa Shirati wilayani Rorya zimedai kuwa hadi kufikia
juzi Ijumaa tayari sh. milioni 16 zilikuwa zimepatikana huku milioni 7 kati ya hizo zikiwa zimechangwa na marafiki zao wa  jijini Dar es salaam kwa kazi hiyo.

Akizungumza na Majira  Jumapili mmoja ya watumishi wa
idara ya ujenzi aliyeomba kuhidhiwa jina lake  alisema kuwa kiasi hicho cha fedha kimemwezesha mgombea  wanayemtaka badala ya mwenyekiti huyo wa zamani Bw. Charles Ochele.

Aliongeza kuwa baada ya kukamilisha ukusanyaji wa michango hiyo kesho Jumatatu wanatarajia kumkabidhi mgombea huyo kwa ajili ya kufanyia kampeni ikiwa ni pamoja na kununua kura kutoka kwa baadhi ya madiwani ili kufanikisha ushindi huo.

Hato hivyo Bw. Ochele alipoulizwa endapo amepata taarifa hizo, alikiri kuambiwa mpango huo lakini alisema hajaweza kuwafahamu wahusika wa mpango huo pamoja na kuelezwa
kuwa ni watumishi wa halmashauri ya Rorya na baadhi ya wakandarasi wa kampuni za ujenzi.

“Niliambiwa juzi walikuwa Shirati wakiwa na kikao cha kukusanya fedha hizo za kuniangusha lakini wanajidanganya mimi ninaamini nitashinda na kamwe siwezi kuwakumbatia
wezi wa  mali za umma katika halmashauri yetu. Mwaka juzi zaidi ya milioni 400 za idara mbalimbali ikiwemo elimu zilitafunwa sasa kweli hawa ni wazalendo kwa
halmashari yetu sitavumilia wizi huu,”alisema Ochele.

Kwa upande wake mkurugenzi wa halmashauri ya Wilaya ya Rorya Bw.  Ernest Basaya alidai kuwa bado hajapata taarifa kuhusu watumishi  wake kufanya mipango hiyo lakini alikiri kuwa inawezekana kwa vile mipango hiyo inafanywa kwa njia ya usiri mkubwa.

“Kwanza nilisikia Ochele atapita bila kupingwa lakini jana nimeambiwa kuna wanachama wengine kama watatu wamechukua fomu ya uenyekiti sasa mipango ya watumishi
wangu kutoa michango hiyo ndio kwanza nasikia taarifa hii lakini inawezekana kwa vile jambo kama hili ni la siri hata hivyo nipe muda nilifanyie uchunguzi,”alisema.

Aliongeza kuwa ni kosa kwa mtumishi kujiingiza katika kampeni za kisiasa kwa lengo la kutafuta viingozi wanaowataka kwa vile jambo hilo linaweza kusababisha mgogoro mkubwa kati ya madiwani na watumishi hao katika utendaji wao wa kazi.

Mbali na Bw. Ochele ambaye anatetea nafasi hiyo pia yumo
Yamo Bw. Odemba, Bw. Okeyo Ogingo, Bw. Ungujo Wakibara na Bw. Lukio Christopher wakati nafasi ya makamu mwenyekiti wa halmashauri ya Rorya aliyechukua fomu ni Bw. Albert Machiwa anayetetea nafasi hiyo.