TETESI BARAZA LA MAWAZIRI:Lowassa atajwa kulilia Tamisemi.

*Yeye asema tuyaache hayo, ni uvumi usio na msingi.

Na Tumaini Makene.
WAKATI Watanzania wakisubiri kwa hamu Baraza la Mawaziri la Rais Jakaya Kikwete litakalomsaidia kuongoza serikali katika ngwe yake ya mwisho, habari zimevuja zikimhusisha Mbunge wa
Monduli, Bw. Edward Lowassa na mikakati ya kukwaa moja ya wizara nyeti katika serikali mpya itakayoundwa na rais siku chache zijazo.

Bw. Lowassa ambaye aliwahi kuwa waziri mkuu katika serikali ya Rais Kikwete kabla hajajiuzulu kufuatia kashfa ya Richmond iliyopewa zabuni ya kuzalisha umeme kinyume cha taratibu, anatajwa katika mikakati ya kuteuliwa waziri katika wizara itakayohusika na tawala za mikoa na serikali za mitaa.

Katika Serikali zilizopita ikiwamo ile ya awamu ya kwanza ya Rais Kikwete wizara hiyo ilikuwa ikijulikana kwa ufupisho kama TAMISEMI (Tawala za Mikoa na Serikali za Mitaa), na inaelezwa kuwa ni nyeti inayompa waziri fursa ya kuwa karibu zaidi na wananchi.

Vyanzo vya habari vilivyo karibu na duru za michakato inayoendelea serikalini juu ya uteuzi wa nafasi mbalimbali hususan zile za kisiasa, vimeliambia Majira kuwa upo msukumo mkubwa kutaka Bw. Lowassa ateuliwe katika nafasi hiyo kwa mustakabali wake kisiasa, hususan katika uchaguzi mkuu wa 2015.

Pamoja na kutoa taarifa hizo, watu hao walio karibu na Bw. Lowassa waliliambia Majira kuwa huenda yeye (Lowassa) hahusiki katika mikakati ya kuzishawishi mamlaka zinazohusika na uteuzi wa mawaziri, kumteua katika nafaii hiyo nyeti, lakini upo msukumo wa wazi kutaka hivyo.

Majira lilipomtafuta Bw. Lowassa juu ya tetesi hizo, alijibu kuwa yeye hajui lolote wala hajasikia kitu kama hicho.

"Sijui lolote wala sijasikia lolote kuhusiana na hicho unachokisema, tuyaacheni kwanza hayo mambo, la sivyo tutakuwa tunazungumzia speculations (tetesi, uvumi) bila sababu yoyote.

"Nasisitiza kuwa sina taarifa zozote kutoka mamlaka za uteuzi, sijasikia kitu kama hicho, ni speculations ambazo hazina maana yoyote ile," alisema Bw. Lowassa ambaye amekuwa swaiba wa karibu wa Rais Kikwete, kikazi na kimaisha, kwa muda mrefu.

Kabla ya kupatikana kwa habari hizo zikimhusiaha Bw. Lowassa na uteuzi wa waziri wa TAMISEMI, kulikuwa na tetesi zilizokuwa zikimtaja kuwa mmoja kati ya watu ambao wangeweza kuteuliwa tena katika nafasi ya waziri mkuu, lakini wadadisi wengi wamesema kuwa itakuwa ni vigumu kutokana na ukweli kwamba Bw. Mizengo Pinda bado ana nafasi kubwa ya kuendelea na Rais Kikwete kumalizia ngwe yao ya mwisho.

Uwezekano wa Bw. Pinda kuendelea na nafasi hiyo ya uwaziri mkuu umeelezwa kuwa ni mkubwa kutokana na uadilifu wake, kutokuwa mtu wa makundi ndani ya CCM na serikalini,  akielezewa kuwa hapendi matumizi makubwa ya fedha za umma, huku pia akiwa hajawahi kukumbwa na kashfa yoyote, hali ambayo inamfanya akubalike kwa kadri upepo wa kisiasa ulivyo nchini kwa sasa.

Vyanzo vya habari vilivyo karibu kikazi na mbunge huyo wa Monduli, vimesema kuwa hali hiyo ya nafasi ya uwaziri mkuu kuonekana 'imejaa' ndiyo imeelezwa kuwa sababu ya Bw. Lowassa kutajwa katika uteuzi wa wizara nyeti ya TAMISEMI.

Pamoja na kuwa wengi wamekuwa wakiichukulia Wizara ya Mambo ya Nje na Ushirikiano wa Kimataifa, kuwa ndiyo moja ya wizara nyeti nchini, maarufu kama 'njiapanda ya ikulu', baada ya kumtoa Rais Mstaafu, Benjamin Mkapa na Rais Kikwete, bado unyeti wa TAMISEMI katika utawala wa nchi haukwepeki kutokana na ukweli kuwa ndiyo wizara yenye mtandao mkubwa ndani ya nchi, ikiwa ni kiunganishi kati ya serikali kuu na serikali za mitaa.

Waziri wa wizara hiyo ambayo mara nyingi imekuwa ikiwekwa chini ya Ofisi ya Waziri Mkuu, ikiwa pamoja na ile inayohusika na maafa na utaratibu wa bunge, ameelezwa kuwa ana afasi pana zaidi ya kukutana na wananchi wa kada mbalimbali katika shughuli mbalimbali za maendeleo zinazogusa maisha ya kila siku ya Watanzania, hasa wale wapiga kura.

TAMISEMI inaonekana kuwa ni wizara mtambuka, ikielezwa kuwa ni kiungo muhimu kati ya wizara za kisekta na asasi mbalimbali za Serikali za Mitaa. ikiwa na jukumu la kuhakikisha yanajengwa mazingira mazuri ya kuwezesha ushirikishwaji wa umma katika kujiletea maendeleo, kwa kuzingatia utawala bora.

Kwa mujibu wa mkataba kwa wateja wa wizara hiyo, kulingana na mpango uliopo sasa wa uboreshaji wa huduma kwa umma, TAMISEMI inategemewa kuongoza na kuwa kiungo kati ya mpango wa uboreshaji wa mfumo wa Serikali za Mitaa na Mpango wa Uboreshaji wa Wizara za Kisekta unaofanywa na sekta mbalimbali ngazi ya Taifa.

Katika kuonesha unyeti wa wizaya hiyo, mkataba huo unaeleza kuwa TAMISEMI ina wajibu wa kuratibu na kusimamia tawala za mikoa ili ziweze kuzisaidia halmashauri katika kutekeleza wajibu na majukumu yake; kutayarisha na kusimamia sera ya maendeleo vijijini; kusimamia utekelezaji wa Sera ya Maendeleo Mijini; kuendeleza programu ya uboreshaji wa mfumo wa Serikali za Mitaa nchini ili ziweze kutoa huduma bora.

Majukumu mengine yametajwa kuwa ni kuzijengea Serikali za Mitaa uwezo wa kusimamia mapato na matumizi; kuboresha miundo, hali ya watumishi na mifumo ya kazi ndani ya TAMISEMI, mikoa na halmashauri; kusimamia asasi, mashirika ya umma na miradi inayotekelezwa chini ya wizara hiyo chini ya Ofisi ya Waziri Mkuu (OWM), kuratibu utekelezaji wa shughuli za hifadhi ya mazingira katika Serikali za Mitaa na pia kuratibu vita dhidi ya rushwa na UKIMWI.

Tangu kujiuzulu kwake uwaziri mkuu kwa kashfa ya Richmond, akiwa waziri mkuu wa kwanza kufanya hivyo nchini, mapema Februari 2008, Bw. Lowassa amekuwa kimya katika masuala mengi ya kitaifa, suala ambalo limekuwa likielezewa na wachambuzi wa mambo kuwa ni mkakati wake wa kisiasa kurudi katika uringo wakati mwafaka ukiwadia.

Wachambuzi wa masuala ya kisiasa waliozungumza na Majira, vikiwemo vyanzo hivyo vya habari, wamesema kuwa nafasi hiyo ya uwaziri wa TAMISEMI, utampatia nafasi nzuri Bw. Lowassa kurudi katika chati ya kisiasa hata kubadili upepo wa kisiasa hasa nje ya CCM ambapo imeelezwa kuwa umekuwa haumwendei vizuri, tangu alipoondoka serikalini.

Hivi karibuni, katika uchaguzi mkuu uliopita, mbunge huyo wa Monduli, alijipatia ushindi wa kishindo na kumshinda kirahisi mgombea wa CHADEMA, Mchungaji Amani Silanga.