Slaa amkataa Kikwete.

*Asema urais wake ulitokana na matokeo yasio halali
*Mbowe asisitiza watadai haki kwa misingi ya amani
*Adai wanajipanga kutoa vielelezo vya wizi wa kura
*CHADEMA kutokubali uteuzi wowote wa Rais Kikwete

Na John Daniel, Dodoma.
CHAMA cha Demokrasia na Maendeleo (CHADEMA) kimeseama hakitambui matokeo ya urais wa uchaguzi mkuu uliopita pamoja na
Rais Jakaya Kikwete aliyetokana na matokeo hayo.

Sambamba na hatua hiyo, chama hicho kimesema kitaendelea kudai uume huru ya uchaguzi pamoja na katiba huru bila kukata tamaa.

Wakizungumza na Waandishi wa Habari mjini hapa jana, aliyekuwa mgombea urais wa chama hicho, Dkt. Willibrod Slaa na Mwenyekiti wa chama hicho, Bw. Freeman Mbowe walisema kamwe hawawezi kumtambua Rais Kikwete kwa sababu ushindi wake 'ulichakachuliwa', hivyo kumtambua ni kutowatendea haki Watanzania.

"Nilishatoa tamko siku chache baada ya uchaguzi na leo narudia tena, sitambui matokeo ya urais na wala simtambui rais aliye madarakani, lengo la demokrasia ni kuwapatia wananchi kiongozi wanayemtaka, hatukuwa na uchaguzi huru wala wa haki, tuliandika barua tume kueleza tulivyobaini matatizo ya uchaguzi na tume ilikiri, lakini hadi leo haijatoa ufafanuzi wa hatua zilizochukuliwa," alisema Dkt. Slaa.

Alisema kitendo cha Tume ya Taifa ya Uchaguzi (NEC) kukiri kuwepo kwa matatizo ni ishara kuwa chombo hicho kilishindwa kusimamia uchaguzi, ama kwa sababu ya uzembe wa watendaji au ilishiriki 'kuchakachua' kura za chama hicho kwa makusudi.

"Nawashukuru Watanzania wote walionipa kura, kama mnavyojua siku za kampeni zilikuwa 71 lakini tuna majimbo ya uchaguzi 239, hata kwa miujiza nisingeweza kufika kila mahali lakini Watanzania wengi walinipa kura nyingi, jukumu langu kama mgombea ni kusema hayo mengine na hatua inayofuta ni ya chama chenyewe, mambo yaliyobaki sasa nakiachia chama," alisema Dkt. Slaa.

Alisema kutokana na jinsi Watanzania walivyojitokeza kumpigia kura hawezi kukata tamaa kudai haki na kuongeza kuwa safari ya ukombozi wa nchi ni ndefu, hivyo ataendelea kudai haki na kuwaomba Watanzania waendelee kukiunga mkono CHADEMA kwa kuwa mapungufu
yaliyojitokeza katika mchakato huo yatabakia kama yalivyo na kamwe hatabadilika wala yeye kukubali matokeo ambayo si sahihi kwa utashi wake.

Akijibu maswali ya waandishi kuhusu sababu iliyomfanya ashindwe kuwataja maofisa usalama walioshiriki kuchakachua kura zake alisema yeye kama mtu makini hawezi kutoa kila kitu mapema na kuwataka watu wanaodai amewadhalilisha au kusema uongo waende
mahakamani ili akawaumbue kwa ushahidi alio nao.

"Namshangaa sana yule Naibu Mkurugenzi wa Usalama wa Taifa, kutaka niwapelekee ushaidi, ushahidi unapelekwa Usalama wa Taifa ili waupeleke wapi wao?" alihoji na kuongeza.

"Nawapa changamoto kama nilivyokwishawaeleza waandishi wa habari awali, kama nimesema uongo waende mahakamani, nitatoa ushaidi wangu mahakamani," alisisitiza Dkt. Slaa.

Kwa upande wake Bw. Mbowe alisema awali walipobaini mwenendo usioridhisha wa uchaguzi Mkuu walitoa tamko la kuitaka NEC kusitisha kuendelea kutangaza matokeo hayo lakini hawakusikilizwa na kwamba njia pekee wanayoweza kufanya kwa sasa ni kudai
kuundwa kwa tume huru ili kuchunguza sababu ya idadi kubwa ya Watanzania kushindwa kujitokeza kupiga kura.

"Tunadai iundwe Tume Huru ya Uchunguzi na kutambua sababu iliyosababisha wengi kushindwa kujitokeza kupiga kura, ua kama walipiga kura lakini kura zao hazikuonekana," alisema Bw. Mbowe.

Alisema sia sahihi kwamba CHADEMA pekee ndicho kinachosikitishwa na idiadi ndogo ya watu waliojitokeza kupiga kura, bali hata wananchi wenyewe wamekuwa wakihoji tatizo hilo kubwa la kidemokrasia nchini.

Kuhusu NEC na hatiba huru, Bw. Mbowe alisema CHADEMA itaendelea kudai kuwepo kwa Tume huru ya uchaguzi na katiba inayokidhi haja ya Watanzana kwa kuwa iliyopo sasa inalinda maslahi ya chama tawala na watu wachache wanaofaidika na chama hicho.

"Tutaendelea kudai Tume Huru ya Uchaguzi na Katiba inayokidhi haja ya Watanzania ndani ya Bunge kupitia wabunge wetu, nje ya bunge na hata nje ya nchi, tutaendelea kukataa matokeo ya urais na kutokumtambua aliyeshinda kwa matokeo hayo ingawa tunaelewa wazi kuwa sheria za nchi na katiba inaeleza kuwa rais akishatangazwa hakuna chombo wala mamlaka ya kuhoji ushindi wake.

Hatuwezi kukaa kimya, kufanya hivyo ni unafiki na udhaifu ambao hatuwezi kuukiri, kwa kusema hivi hatuwatumi Watanzania kuingia barabarani, tutaendelea kudai haki kwa amani," alisema Bw. Mbowe.

Alipoulizwa uhalali wa wabunge wa chama hicho kuendelea kukaa bungeni kusikiliza hotuba ya rais ambaye hawamtumbia na kupitisha jina la waziri mkuu ambaye atateuliwa leo na kiongozi wasiyemtambua, alisema msimamo huo wa kutomtambua rais haiwafanyi wawakilishi kupitia CHADEMA kutotimiza wajibu wao kwa kuwa huo ni udhaifu wa katiba iliyopo sasa ambayo wanalazimika kuifuata japo ni mbovu na haikidhi matakwa ya Watanzania.

"Mabadiliko katika taifa ni process (mchakato) lakini kila jambo tunalofanya inajenga tofauti moja, tunaendelea kudai Tume Huru na Katiba mpya, kwa njia mbalimbali, msije mkashangaa mtakaposikia CHADEMA inapanga na kufanya maandamano sehemu mbalimbali
nchini," alisema Bw. Mbowe.

Akijibu swali kuhusu ushirikiano wa vyama vya upinzani bungeni, Bw. Mbowe alisema CHADEMA imeacha milango wazi kwa chama chochote makini kuungana nao lakini hawako tayari kuungana na chama ambacho hakipo makini.

"Jambo muhimu siyo kuunganisha vyama vya siasa, muhimu ni kuunganisha fikra na mawazo yanayokubaliana, tuko tayari kushirikiana na chama chochote makini, inashangaza kuona chama cha upinzani kikitupeleka mahakamani kudai fidia ya mabilioni," alisema Bw. Mbowe bila kutoa ufafanuzi wa kina.

Alipoulizwa kuhusu vielelezo vinavyothibitisha kura zao kuibwa na chama tawala, alisema watatoa taarifa ya kina na vielelezo vyote baada vikao vya juu vya Kamati Kuu na Baraza Kuu vya CHADEMA
kukutana na kuridhia hatua hiyo.

Alisema vikao hivyo vitafanyika hivi karibuni na kuongeza kuwa tamko walilotoa jana lililenga kufuta dhana kwamba wameridhika na kila kilichotokea katika uchaguzi mkuu na kwamba walishirikisha wabunge wa chama hicho na baadhi ya viongozi katika tamko
hilo kabla ya kulitoa kwa wana habari.