Shahidi wa Mramba abanwa mahakamani.

Na Peter Mwenda.

SHAHIDI wa 13 katika kesi ya matumizi mabaya ya madaraka inayomkabili Waziri wa Zamani wa Fedha, Bw. Basil Mramba jana alipata wakati mgumu baada ya kubabaika mara kwa mara kujibu maswali ya
Wakili Hubert Nyange anayemtetea mshitakiwa.

Bi. Christile Shelukindo ambaye ni Kaimu Kamishna wa Kodi wa Manispaa ya Kinondoni alieleza Mahakama ya Hakimu Mkazi Kisutu kuwa kiasi cha bil. 11.7 kilitokana na hesabu zilitakiwa zilipwe serikalini.

"Kiasi hiki sh. il. 11,752,350,114 ndicho Kampuni ya Alex Stewart ilitakiwa ilipe serikali, tuliwajibu PCCB barua yao ya kutaka mahesabu halisi waliyotakiwa kulipa," alisema Bi. Christile.

Wakili: Hizo Financial statement ambazo uliletewa na PCCB zilikuwa zimesainiwa na nani?

Shahidi: Sikuziona

Wakili: Kwanza ulisema nyaraka hizo ulizipokea wewe na kuzifanyia kazi na sasa unasema hukuziona je, ukweli ni upi?

Jopo la Mahakimu watatu wanaosikiliza kesi hiyo akiwemo Jaji John Utamwa walishtuka kusikia shahidi huyo kukiri kuziona hesabu hizo na baadaye kukataa kuwa hakuziona.

Ndipo Jaji Utumwa alipiomuuliza je, unafuta usemi wa kwanza kuwa hesabu hizo hukuziona?"

Shahidi alikaa kimya na baadaye kujibu ndiyo. Ndipo wakili Nyange alipotaka aeleze mahakama nyaraka zilizotumika kubaini msamaha wa kodi wa sh bil. 11.7 ulitokana na mahesabu kutoka TRA au kampuni ya Alex Stewart.

"Unasema ulipokea barua kutoka PCCB ikikutaka upige mahesabu je, alikuwepo Ofisa wa Kampuni ya Alex Stewart? au mmepiga mahesabu kutoka mahesabu ya TRA, je, huoni kuwa hizo si hesabu halali?

Shahidi: Hapana.

Katika kesi hiyo ambayo shahidi huyo anaendelea kutoa ushahidi leo Bw. Mramba, Waziri wa zamani wa Madini Bw.Daniel Yona na Katibu Mkuu wa zamani wa Wizara ya Fedha Bw. Gray Mgonja wanakabiliwa na kesi ya kusababisha serikali hasara ya sh. bil. 11.7 wakati wakiwa madarakani.