ASKOFU KULOLA AFARIKI DUNIA

 Na Mwandishi Wetu

ASKOFU Mkuu wa Kanisa la Evangelistic Assemblies of God nchini (EAGT), Dkt. Moses Kulola (83), amefariki dunia baada ya kuugua kwa muda mrefu.Taarifa zilizolifikia gazeti hili, zinasema Askofu Kulola amefariki jana saa sita mchana katika Hospitali ya Army, iliyopo Msasani, Dar es Salaam, ambako alikuwa amelazwa.

Akizungumzia na gazeti hili juu ya kifo hicho, Mchungaji wa Kanisa la EAGT City Centre, Florian Katunzi, alisema kifo cha Askofu Kulola, huo ni pigo kubwa si kwa familia na waumini wake pekee bali kwa Watanzania wote.

Alisema mbali ya kuumwa muda mrefu (bila kutaja ugonjwa uliokuwa ukimsumbua), alisema uzee nao umechangia kifo chake na aliwahi kupelekwa nchini India kwa matibabu.Aliongeza kuwa, Askofu Kulola anatarajiwa kuzikwa wiki ijayo nyumbani kwao Bugando, mkoani Mwanza, ambapo msiba upo kwenye Kanisa la EAGT, Temeke.

Taarifa ambazo hazijathibitishwa, zinasema Askofu Kulola, alikuwa na wanachama wasiopungua milioni tano nchi nzima na kufungua matawi katika nchi za Zambia na Malawi.Askofu Kulola amehubiri neno la Mungu kwa zaidi ya miaka 60 hivyo ataendelea kukumbukwa kwa miujiza aliyokuwa akiionesha kwa waumini wake ikiwa ni harakati zake za kuwakomboa wanadamu.