Kada CCM: Bunge linamuaibisha Rais kikwete

Na Suleiman Abeid, Shinyanga

 KADA wa Chama Cha Mapinduzi (CCM), mkoani Shinyanga, Mberito Magova, ameliponda Bunge la Jamhuri ya Muungano wa Tanzania na kudai linastahili kuvunjwa, kuitisha uchaguzi upya kwa sababu linamuaibisha Rais Jakaya Kikwete.

Alionesha kukerwa na kitendo cha Serikali ya CCM kutumia takwimu zisizo sahihi kuonesha uchumi unakua wakati unaporomoka kwa kasi ya kutisha.

Magova ambaye hivi karibuni alistaafu katika nafasi ya Katibu wa CCM Wilaya, aliyasema hayo juzi mjini humo alipokuwa akizungumza na gazeti hili juu ya mustakabali wa Taifa kwa sasa na kudai kuwa, wabunge wameshindwa kuisimamia Serikali badala yake wanatanguliza itikadi za vyama.

Alisema matukio yanayotokea ndani ya Bunge kwa sasa, inaonesha ni jinsi gani wabunge

wasivyoelewa wajibu wao wanapokuwa katika vikao hivyo, kuacha kujadili mambo muhimu yenye masilahi kwa Taifa badala yake wanatumia fursa walizonazo kutukanana.

“Wabunge wetu wameshindwa kutimiza wajibu wao kikamilifu, mfumo wa uendeshaji wa Serikali haufuatwi matokeo yake kila jambo linabaki kumtegemea rais wa nchi.

“Utakuta mbunge anasimama na kuhoji Serikali imelifanyia nini jimbo lake...kauli hii kutolewa na mbunge ni kosa, Waziri Mkuu kama kiongozi wa Serikali bungeni, ndiye anayepaswa kumhoji mbunge ana mipango gani ya maendeleo katika jimbo lake ili Serikali ichukue hatua ya kuitekeleza.

“Mbunge anasimama bungeni na kulalamikia mdondoko wa elimu jimboni kwake wakati yeye hajawahi hata siku moja kuitisha kikao cha bodi za shule ili kuangalia ni jinsi gani watakabiliana na changamoto zilizopo,” alisema.

Aliongeza kuwa, hivi karibuni Mbunge wa Bariadi Mashariki, mkoani humo, Bw. John Cheyo (UDP), alisimama bungeni na kumshauri Rais Kikwete alivunje Bunge kwa vile limepoteza mwelekeo wakati yeye ndiye aliyepaswa kuonesha mfano kwa kujiuzulu ubunge wake.

“Kama kauli yake ilikuwa na dhamira ya kweli, angeanza kujiuzulu yeye...alichokisema ni mwendelezo wa siasa za majukwaani ili kujizolea umaarufu kwa jamii,” alisema.Kuporomoka kwa uchumi.

 Akizungumzia kauli inayotolewa na Serikali mara kwa mara juu ya uchumi wa nchi kukua, Magova alisema kauli hiyo si ya kweli kutokana na uhalisia wa maisha ya Watanzania wengi pamoja na mzigo mkubwa wa madeni yaliyopo.

Alisema kama unakua ni wazi maisha ya Watanzania yangekuwa bora kuliko ilivyo sasa mbapo sehemu kubwa ya wananchi kutwa wanashindia mlo mmoja na kipato chini ya dola moja kwa siku.

“Anayesema uchumi wetu unakua ni muongo, huenda anatumia takwimu za upimaji uchumi ambazo si sahihi, deni la Taifa ni kubwa kiasi cha kutisha, hali ya maisha ni mbaya tofauti na miaka 40 iliyopita,” alisema Magova.

Aliongeza kuwa, ushahidi mwingine wa kuporomoka kwa uchumi wa nchi ni kufa kwa viwanda vingi vikubwa ambavyo vilianzishwa katika utawala wa Serikali ya Awamu ya Kwanza ambapo hivi sasa kila kitu kinaendeshwa na wawekezaji.