Mbatia afichua ufisadi Tanesco *Aeleza madudu ya Mhando, aonesha mkataba wake *Siri wabunge CCM kumng'oa Waziri sasa yafichuka

Na  Benedict Kaguo, Dodoma

MWENYEKITI wa Chama cha NCCR-Mageuzi, Bw. James Mbatia, jana ameibua ufisadi wa kutisha wa ununuzi mafuta ya kuendeshea mitambo ya IPTL na kudai baadhi ya wabunge walihongwa ili kumtetea aliyekuwa Mkurugenzi Mkuu wa Shirika la Umeme Tanzania (TANESCO), Bw. William Mhando.


Akizungumza na waandishi wa habari mjini Dodoma, Bw Mbatia ambaye ni Mbunge wa kuteuliwa, alisema kipindi cha wiki moja sasa, kumekuwa na vikao vya chini chini ambavyo vinafanyika ndani ya Bunge, nje ili kutoa mapendekezo ya Bw. Mhando kuonewa juu ya tuhuma zinazomkabili.

Alisema Waziri Nishati na Madini, Profesa Sospeter Muhongo na Katibu Mkuu wa Wizara hiyo, wamefanikiwa kuziba mianya ya watu wachache kunufaika na miradi ya TANESCO.

“Hali hii ndiyo imechangia kuundwa timu inayohusisha baadhi ya wabunge ili kuonesha wenye matatizo ni viongozi wa Wizara sio Maofisa wa TANESCO,” alisema Bw. Mbatia.

Alisema inasikitisha kuona wabunge wameingia katika ufisadi wa kutisha, kuweka masilahi yao kwanza na kusababisha Taifa liingie katika matatizo ya umeme.

Bw. Mbatia alidai hadi June mwaka huu, TANESCO walipewa sh. bilioni 222.1 na Serikali kama ruzuku ili kuendeshea shirika hilo kukabiliana na tatizo la mgawo lakini walikuwa wakizima mitambo ya umeme kwa makusudi ili waweze kunufaika na mgawo kwa kununua mafuta kutoka katika kampuni yao.

“Kampuni ya Puma ambayo zamani ilikuwa iliitwa BP ambayo sehemu kubwa inamilikiwa na Serikali, ilisema katika mradi huo wa mafuta ya mitambo itauza sh. 1,460 kwa lita, baadhi ya kampuni zilizoingia katika ushindani kwenye kandarasi ya kusambaza mafuta, wenyewe walikuwa wauze sh. 1,800 kwa lita.

“Katibu Mkuu wa Wizara hii alitumia mamlaka yake kwa mujibu wa sheria na kutengua maamuzi ya kununua mafuta kutoka kampuni binafsi hivyo kuokoa sh. bilioni 6 kwa mwezi, ambapo Serikali ingeingia hasara kama ingenunua mafuta katika kampuni binafsi,” alisema Bw. Mbatia.

Aliongeza kuwa, TANESCO haikuwa na sababu ya kupewa ruzuku kwani makusanyo ya mwezi katika shirika hilo ni makubwa ambapo Julai mwaka huu, wamefanikiwa kukusanya sh. bilioni 85, hivyo kulikuwa na haja gani kutoa ruzuku kwa shirika ambalo linajiendesha kwa faida.

Bw. Mbatia alisema kutokana na kashfa hiyo, Kamati ya Nishati na Madini imekosa uhalali na baadhi ya wabunge ambao ni wajumbe wa bodi kwani ndio wamechangia kutokea wizi huo.

Alitaka Menejimenti ya TANESCO na Bodi ya Wakurugenzi, wote hawafai, wanapaswa kukamatwa na kufikishwa katika vyombo vya dola kwa kutaka kuliua shirika la umma.

Alitoa waraka wa mkataba aliosaini Bw. Mhando na mkewe wa sh. milioni 800 (kwa waandishi wa habari), ili kusambaza vifaa vya ofisini ambapo kampuni hiyo ilikuwa na mtaji wa sh. milioni 10 tu, na kueleza kuwa hayo ni matumizi mabaya ya madaraka.

Mkakati wa kumngo’a Waziri

Wakati Waziri wa Nishati na Madini, Prof. Muhongo akitarajiwa kuwasilisha Bajeti ya Wizara yake leo, wabunge wa Chama Cha Mapinduzi (CCM), usiku wa kuamkia jana walikutana kwa udharura kujadili suala la baadhi ya wabunge wa chama hicho kutaka kuwasilisha hoja ya watendaji wakuu wa Wizara hiyo wang’olewe.

Kkikao hicho ambacho kilifanyika kwenye ukumbi wa Msekwa kilikuwa na ajenda kuu ya kujadili hoja ya baadhi ya wabunge waliotaka kuwasilisha hoja binafsi.

Hoja hiyo ni kutaka Prof. Muhongo na Katibu Mkuu waondelewe kwa madai ya kukiuka sheria ya manunuzi kwenye ununuzi wa mafuta ya kuendeshea mitambo ya kuzalisha umeme ya IPTL.

Hata hivyo, kikao hicho ambacho kilitawaliwa na mvutano mkali ambapo wabunge wengi waliwalaumu wenzao kwa kuendesha kampeni hiyo baada ya kuhongwa na TANESCO ili watetee uamuzi wa kutaka mafuta hayo yanunuliwe na kampuni binafsi.

Kampuni hizo zinataka kuizia TANESCO lita moja ya mafuta sh.  1,800 badala ya sh.1,460 inayonunuliwa na Kampuni ya Puma ambayo zamani ilikuwa ikiitwa BP.

Habari za uhakika kutoka ndani ya kikao hicho, zilisema wabunge waliochangia waliwanyooshea kidole baadhi ya wabunge wachache
wanaodaiwa kununuliwa.