Ashikiliwa kwa kumjeruhi mtoto wa kambo

Na Mhaiki Andrew, Songea

JESHI la Polisi mkoani Ruvuma, linamshikilia mkazi wa Kijiji cha Likarangiro, Kata ya Tanga, wilayani Songea, Bw. Batazari Shawa, kwa kosa la kumchapa zaidi ya saa tatu na kumjeruhi mtoto wa kambo (jina tunalo), baada ya kupoteza sh. 800, zilizotokana na mauzo ya mahindi.



Akizungumza na Majira nje ya Kituo Kikuu cha Polisi mjini Songea, mama mzazi wa mtoto huyo, Bi. Scolastika Njafura (38), alisema mtoto huyo alipata maumivu baada ya kuchanika katika makalio.

Bi. Njafura alisema siku ya tukio, alirejea kutoka shambani na kumkuta mtoto wake akiwa amelala lakini alikuwa akilia kutokana na maumivu aliyokuwa nayo.

“Nilipomuuliza kulikoni alisema, baba yake wa kambo amempiga viboko baada ya kupoteza sh.800, zilizotokana na mahindi aliyouza hapa kijijini na kunionesha majeraha ya vidonda kwenye makalio.

“Vidonda hivi vilimfanya ashindwe kusimama na kutembea hivyo nimelazimika kuja polisi kuomba PF3 ya kwenda hospitali kwa ajili ya matibabu kabla ya kufungua jarada SO/IR/2618/2012 na mtuhumiwa amekamatwa,” alisema.

Kwa upande wake, mtoto aliyefanyiwa kitendo hicho alisema baba yake ya kambo ana tabia ya kuwafanyia yeye na wagodo zake hasa mama yao anapokwenda shambani kwa kuwacharaza viboko akidai wanamdharau na hawamuheshimu jambo ambalo si kweli.

“Siku ya tukio baada ya kula chakula cha mchana, baba alinituma kwenda kuuza mahindi kwa walanguzi, baada ya kufika yalipimwa na thamani yake ilikuwa sh. 800.

“Wakati narudi nyumbani nilikuwa ninikimbia ili niweze kuwahi, baada ya kufika na kuangalia fedha niliyopewa sikuiona hivyo nilibaini zimepotea wakati nakimbia ili kuwahi nyumbani.

“Baada ya kumweleza baba mazingira halisi yaliyochangia nipoteze fedha hizi, kwanza alibadilika sura, kuchukua fimbo ya mti wa mwanzi na kuanza kunichapa hadi kusababisha nikose nguvu,” alisema mtoto huyo.

Kwa upande wake, Bw. Shawa ambaye anatuhumiwa kufanya kitendo hicho, alikiri kumchapa mtoto huyo zaidi ya saa tatu.

Mwenyekiti wa Mtandao wa Polisi Wanawake mkoani hapa, Inspekta Anna Tembo, aliitaja jamii inayolea watoto ambao wameondokewa na wazazi wote au mmoja, kutoa matunzo mazuri kwa watoto hao badala ya kuwafanyia vitendo vya ukatili, kuishia katika mikono ya dora na hatimaye gerezani kutumikia kifungo.

Kwa upande wake, Kamanda wa Polisi mkoani hapa, Deusdedit Nsemeki, alikiri kupokea taarifa ya mtoto huyo ambaye anadaiwa kufanyiwa vitendo vya kikatili.