CHADEMA yajivunia kumkamata DC Igunga

*Yadai kikao alichokuwa akiendesha cha uhalifu
*Yajipanga kuwapigania waliokamatwa hadi wachiwe
*Mgombea CUF alaani DC Kimario kupingwa hadharani

Na Benjamin Masese, Igunga

CHAMA cha Demokrasia na Maendeleo (CHADEMA), kimesema kilikuwa sahihi  kumkamata na
kumdhibiti Mkuu wa Wilaya ya Igunga,Bi. Fatuma Kimario, kutokana na kuingilia mkutano wake kinyume cha sheria ili kulinda amani kwa kuwa kikao alichokuwa akiendesha kilikuwa cha uhalifu.

Akizungumza na waandishi wa habari mjini hapa jana, Mkurugenzi wa Sheria, Katiba na Haki za Binadamu wa CHADEMAhama, Bw.Tundu Lissu, alisema uamuzi huo unatokana na maadili ya uchaguzi ambayo  yanazuia viongozi wa serikali kujihusisha na kampeni wakitumia rasilimali za serikali kwa manufaa ya chama tawala.

Alisema Bi. Kimario  hana mamlaka yoyote ya kisheria ya kupokea barua za maombi ya watu kwa ajili ya kusimamia uchaguzi kazi ambayo alikuwa akifanya.

“Chadema ilikuwa halali kumdhibiti Bi.  Kimario kwa sababu kama angeendelea kufanya kikao pale angeweza kuhatarisha amani na utulivu…nawaambia kwamba maadili ya uchaguzi yanawazuia viongozi wa serikali, mawaziri, ma-RC na ma-DC kufanya shughuli zozote za serikali zinazoendana na serikali…tunasikitika kuona jeshi letu limewakamata viongozi wetu," alisema Bw. Lissu na kuongeza;

"Waliotumia mamlaka yao kisheria kama raia kukamata wahalifu pale wanapokutwa wakifanya uhalifu, lakini hakuna polisi karibu, sasa inaonekana polisi wamejigeuza kuwa mkono wa mabavu wa CCM , baadala ya kuwa walinzi wa sheria za Tanzania,”alisema Bw.Lissu

Alisema mkuu huyo wa wilaya aliburuzwa  kwa sababu aligoma kutii amri halali ya kujisalimisha, ndipo wananchi na viongozi wakatumia mamlaka ya uraia kumdhibiti kwa sababu alikuwa anajadili suala la uchaguzi.

Alisema wabunge waliokamatwa  Bw. Sylvester Kasulumbayi (Maswa Mashariki) na Bi. Suzan Kiwango (Viti Maalum), hawana kosa lolote  la kujibu mahakamani kutokana na mambo hayo kutokea kila chaguzi zinapofanyika.

 “Kama kawaida polisi wanajificha ya taarifa za kiintelejensia  kujaribu kuhalalisha kitendo hiki,kila mwenye macho na kila mwenye kuona ni kutaka kuona viongozi wetu hawapati msaada wa wakili pamoja na wadhamini ambao wangeupata kirahisi katika Mahakama ya Wilaya ya Igunga,

Alisema kama wabunge hao leo hawatapewa dhamana ambayo ni haki yao ya msingi, jeshi la polisi limtafutie chumba cha kumhifadhi ili aunganishwe na watuhumiwa wengine.

Alisema jeshi la polisi linatengeneza mashujaa wa ukombozi wa pili wa Tanzania, kama ambavyo jeshi la polisi la kikoloni lilivyotengeneza mashujaa wa ukombozi wa Tanganyika kwa  kuwakamata na kuwafungulia mashitaka ya kutunga viongozi wa  TANU, kama vile marehemu Baba wa Taifa, Mwalimu Julius Nyerere.

“Kama mtakumbuka baada ya msukosuko wote, hao ndiyo waliokuja kuwa viongozi waandamizi wa  Tanganyika huru na ndivyo  tunavyoona mambo ya leo ya CCM ya kuwakamata na kuwashitaki wanaharakati wa CHADEMA.

Alisema kukamatwa kwa viongozi hao hakutaathiri mwenendo wa kampeni ya nafasi ya CHADEMA kuibuka na ushindi.

Katika hatua nyingine wabunge hao,Bw. Kasulumbayi,Bi. Kiwanga pamoja na kada wa chama hicho, Bw. Anuary Kashaga wanatarajiwa kupandishwa kizimbani katika Mahakama ya Mkoa wa Tabora kujibu mashitaka yanayowakabili.


Wakati huo huo mgombea ubunge kwa tiketi ya CUF katika uchaguzi wa mdogo wa Jimbo la Igunga, Bw. Leopold Mahona, amelaani kitendo cha viongozi na wafuasi wa  CHADEMA kumtwanga Mkuu wa Wilaya ya Igunga, Bi.Fatuma Kimario.

Akihotubia  mkutano wa kampeni uliofanyika katika Kata ya Ziba jana, Bw. Mahona alisema kitendo hicho kimemdhalilisha kiongozi huyo wa serikali kutokana na kupigwa hadharani.

"Kitendo cha kumpiga DC ni utovu wa nidhamu, ni kiongozi wetu wa serikali... yule ni sawa na mama yangu, kwanini umpige wakati sheria zipo,nalaani kitendo cha kumpiga DC" alisema, Bw. Mahona.

Alisema kuna watu wamedhamiria kuleta fujo katika jimbo la Igunga hao ni wageni kwa sababu mila na desturi za wenyeji wa jimbo hilo hawana
tabia ya kupigana kwa ajili ya siasa.

Bw. Mahona alisema matukio ya kumwagiwa tindikali kwa kijana anayedaiwa ni mfuasi wa CCM na kitendo cha kukatwa mapanga kwa mkazi mwingine wa jimbo hilo hayakuwepo kabla ya kampeni.

Aliwataka wananchi wasikipigie kura chama ambacho kitawaletea madhara badala yake wachague mgombea wa CUF ambaye ana sera za amani na utulivu kwa
Watanzania.