Hatimaye bei ya mafuta yashuka

Na Rachel Balama

MAMLAKA ya Udhibiti wa Huduma za Nishati na Maji (EWURA)  imetangaza kushusha bei ya mafuta ya jumla na rejareja ikilinganishwa na ilivyokuwa katika toleo la Julai Mosi, mwaka huu.


Taarifa iliyotolewa kwa vyombo vya habari na Mkurugenzi Mtendaji wa EWURA, Bw. Haruna Masebu ilisema punguzo la bei kwa lita ya petroli ni sh. 202.37 sawa na asilimia 9.17, dizeli sh. 173.49 sawa na 8.32% na mafuta ya taa ni sh. 181.37 sawa na 8.70%.

Mlinganisho wa bei ya mafuta za Julai na zile za Agosti Mosi mwaka huu kwenye mabano ni sh.2,206.16 (sh.2,003.79); sh. 2,084.33 (sh. 1,910.84) na sh.2,085.90 (sh.1,904.53).

Alisema merekebisho yamefanywa kwenye tozo zinazokusanywa na taasisi mbalimbali za serikali kulingana na majukumu waliyonayo kwenye mfumo wa biashara ya mafuta.

Kwa mujibu wa Bw. Masebu, katika petroli imepunguzwa kutoka sh. 54.03 kwa lita hadi sh. 27.27 (49.53%); dizeli kutoka sh. 55.00 hadi sh. 28.15 kwa lita (48.80%) na kwa mafuta ya taa kutoka sh. 55.66 kwa lita hadi sh. 24.50 sawa na asilimia 55.98 kwa lita. Kwa ujumla, tozo za taasisi zimepungua kwa asilimia 51.44.

Alisema kwamba bei zingeshuka zaidi lakini kupanda kwa bei katika soko la dunia na kuendelea kushuka kwa thamani ya shilingi ya Tanzania ikilinganishwa na dola ya Marekani, ambayo hutumika katika manunuzi ya bidhaa za mafuta kwenye soko la dunia.

Alizitaja changamoto zinazosababisha bei za mnafuta kuwa juu ni kupanda kwa bei ya mafuta katika soko la dunia na kuyumba kwa thamani ya shilingi dhidi ya dola ya Marekani kutaendelea kuathiri mwenendo wa bei za mafuta hapa nchini.

Alitolea mfano-Juni, mwaka huu thamani ya sarafu ya Tanzania ilikuwa ni sh. 1,555.31 ukilinganisha na dola; lakini sasa ni sh. 1,570.87.