Bunge halijapokea shangingi la Mbowe

Na Grace Michael, Dodoma

WAKATI Kiongozi wa Upinzani Bungeni, Bw. Freeman Mbowe akisema amerejesha gari kwa lengo la kupigwa mnada na fedha kuelekezwa katika miradi ya
maendeleo, Uongozi wa Bunge umesema bado haujapata taarifa yoyote ya kiofisi inayoonesha kurejeshwa kwa gari hilo.

Hatua hiyo ilijulikana jana mjini hapa wakati Kaimu Katibu wa Bunge, Bw. John Joel akizungumza na waandishi wa habari kuhusiana na madai ya Bw. Mbowe.

“Mpaka sasa hatuna taarifa zozote za maandishi za kurejeshwa kwa gari hilo na kama taarifa hiyo itakuja tuko tayari kusikiliza maamuzi yao...Bunge lina utaratibu wa kutoa magari, nyumba na walinzi kwa viongozi bungeni kulingana na hadhi yao, hivyo kama watarejesha tuko tayari kwa kuwa sisi ni watendaji zaidi na
si wanasiasa,” alisema Bw. Joel na kuongeza kuwa Bw. Mbowe pia amepewa nyumba Dodoma na Dar es Salaam kama Kiongozi wa Kambi ya Upinzani.

Juzi Bw. Mbowe aliwaeleza waandishi wa habari mjini Dodoma kuwa, "...kiongozi wa Kambi Rasmi ya Upinzani Bungeni (KUB) Mhe. Freeman Mbowe, ameamua kurejesha gari yake aina ya “Shangingi” alilopewa na Bunge ili liwe la kwanza kupigwa mnada. Tunawataka wabunge wengine waunge mkono hoja hizi kwa masilahi ya wananchi na taifa kwa ujumla".

Lengo la hatua hiyo, Bw. Mbowe alisema ni kutaka kuipunguzia serikali mzigo, kisha fedha hizo kuongezwa katika bajeti ya maendeleo ili kupunguza ukali wa maisha kwa Mtanzania wa kawaida kwa kuboresha miradi ya maendeleo yanayosuasua kwa sasa kwa maelezo kuwa 'sungura ni mdogo'.

Akizungumzia suala la Kambi Rasmi ya Upinzani kuandika barua kutaka kutenganisha fomu za mahudhurio na za kuchukua posho ili kutofautisha waliohudhuria na waliopokea posho, alisema kuwa fomu wanazojaza wabunge ni kwa ajili ya mahudhurio, ambayo lengo lake ni kujua endapo mbunge amehudhuria kikao cha bunge.

“Fedha zote zinaingizwa benki moja kwa moja, hivyo suala la kutenganisha fomu halina msingi,” alisema Bw. Joel, huku akisema mpaka sasa wabunge hao wanaendelea kupokea posho hizo kwa kuwa hawajawasilisha barua ya kukataa posho hizo.

Hata hivyo, Bw. Joel alisema kuwa, 'kama wanataka kukataa posho hizo waandike barua na kuweka saini zao ili ijulikane ni nani anakataa', kauli ambayo inatofautiana na aliyotoa Spika wa Bunge, Bi. Anne Makinda wakati akizungumzia suala la Mbunge wa Kigoma Kaskazini, Bw. Zitto Kabwe aliyeandika barua kuzuia posho zake na kuelekeza zipelekwe kwenye Taasisi Maendeleo Kigoma (KDI).

Katika majibu yake, Bi. Makinda alisema ulipaji wa posho ni kwa mujibu wa sheria na fedha hizo hupelekwa moja kwa moja kwenye akaunti ya mbunge kwa kuangalia orodha ya mahudhurio.

Akizungumzia masuala hayo, Mnadhimu Mkuu wa Kambi ya Upinzani, Bw. Tundu Lissu, alisema jana kuwa gari la Bw. Mbowe limekabidhiwa tangu juzi lakini alipohojiwa zaidi kueleza lilikabidhiwa wapi, aliwataka waandishi wa habari kumhoji Bw. Mbowe mwenyewe.

Kuhusiana na suala la posho, Bw. Lissu alisema kuwa wanatarajia kuwasilisha barua rasmi leo kwa lengo la kuzikataa.

Wakati huo huo kambi hiyo imewasilisha rasmi barua ya malalamiko kwenye Kamati ya Kanuni ya Kudumu ya Bunge kumshtaki Spika Makinda kwa kuendesha bunge kiupendeleo.

Bw. Lissu alisema kuwa barua hiyo wameikabidhi rasmi juzi kwa Katibu wa Bunge.

Malalamiko hayo yalitokana na kitendo cha Spika kumzuia Waziri Mkuu, Bw. Mizengo Pinda kujibu swali lililokuwa limeulizwa likitaka ufafanuzi wa mauaji ya wananchi katika Mgodi wa Nort Mara yaliyofanyika hivi karibuni, akisema liko mahakamani.

Maoni kuhusu shangingi la Mbowe

Mwanazuoni wa Chuo Kikuu Dar es Salaam (UDSM), Bw. Bashiru Ally mbali ya kupongeza uamuzi Bw. Mbowe, alisema hatua hiyo haipaswi kuishia hapo kwani mjadala ni mpana zaidi ya posho na mashangingi, anaripoti Tumaini Makene.

Alisema hoja hiyo ni matokeo ya taifa kukumbatia mfumo wa ubepari uchwara, ambao umezalisha viongozi wasiowajibika kujali maisha ya wananchi wao, na kuwa hiyo ni dalili za dhahama kubwa ya mgawanyo usiokuwa sawa wa rasilimali za taifa.

"Hoja za posho, magari ya anasa ni hoja nzito na zenye maana kwa jamii, na hicho alichokifanya ni sahihi lakini mimi nadhani tuko kwenye crisis...taifa liko kwenye dhahama kubwa, lakini mara nyingi tumekuwa tukitumia muda mwingi kujadili dalili za tatizo badala ya chanzo kilichozalisha matatizo tuliyonayo.

"Tuna tatizo kubwa la uzalishaji na mgawanyo wa rasilimali au mapato yetu, tumelea mfumo wa ajabu sana ambao umesababisha ufa mkubwa sana kati ya mfumo wa uzalishaji na mfumo wa ugawanyaji rasilimali zetu. Hii ni kwa sababu tumekumbatia ubepari uchwara.

"Mfumo ambao umezalisha viongozi wasiojali akina mama wanaokufa wakijifungua, mfumo ambao umezalisha wanasiasa na viongozi limbukeni, ngoja nikupatie mfano. Makamu Mkuu wa chuo cha SAUT (Mtakatifu Augustine, Mwanza) nimekutana naye akiendesha gari mwenyewe gari lake la kawaida tu, lakini makamu wakuu wa vyuo vyetu vya umma wana magari yao ya kazini aina ya mashangingi na gari ya nyumbani, wanatumia magari ya anasa wakati vyuo vyetu hivi hivi havina chaki, wala ofisi, ninavyokwambia hapa mimi nina muda mrefu sina ofisi maalumu ya kueleweka."

Kwa upande wake, Mwenyekiti wa Chama cha Democratic Party (DP), Mchungaji Christopher Mtikila, alisema kuwa uamuzi wa Bw. Mbowe ni wa kupongezwa, akisema wakati sasa umewadia kwa suala la matumizi makubwa ya serikali kuwa moja ya chanzo cha hamasa ya mabadiliko nchini.

Alisema katika kuzunguka kwake duniani, amewahi kwenda Uingereza na Marekani ambako alikuta watumishi wa umma, wakiwemo wanasiasa, wakitumia usafiri wa kawaida, huku wakiwaheshimu wananchi wao, kwani wanajua wakifanya matumizi ya anasa 'watalipuka' kuhoji wametoa wapi mamlaka hayo ya 'kutanua' kwa kutumia rasilimali za nchi.

"Nmekwenda mimi 10 Down Streets pale Uingereza, wanatumia magari wanayotengeneza wenyewe, vifuu vile...Austin, ambavyo hata parking ni economical pia, nikamuuliza mmoja wa waandishi wa habari pale kwa nini wanatumia haya, akasema wanajua siku wakinunua mashangingi kutakuwa na upingaji mkubwa nchi nzima.

Mchungaji Mtikila alisema kuwa mabilioni ya fedha hayo yakayookolewa kwa kuminya matumizi makubwa ya watumishi wa umma, yapelekwe kwenye miradi ya maendeleo au katika kusaidia huduma za jamii kama vile kukopesha dawa hospitalini ili 'Watanzania waweze kuahirisha vifo vinavyoepukika na kuongeza siku za kuishi."