Ulaya yaimwagia sifa EWURA

Na Mwandishi Wetu

MAMLAKA ya Udhibiti wa Huduma za Nishati na Maji (EWURA) imeongoza kwa kuwa Mamlaka bora kwenye masuala ya udhibiti barani Afrika, kwa mujibu wa
utafiti uliofadhiliwa na na Tume ya Jumuiya ya Ulaya (EU) hivi karibuni.

EWURA imetajwa kuwa ni moja ya taasisi zinazokidhi matakwa ya Mamlaka ya Udhibiti wa Ununuzi wa Umma (PPRA) baada ya kuibuka na ushindi wa asilimia 98 kati ya taasisi za umma 2,019.

Matokeo ya utafiti huo yaliwasilishwa kwenye mkutano wa Mamlaka za udhibiti uliofanyika Nairobi, Kenya kati ya Februari 28 na Machi 4, mwaka huu, EWURA ilitangazwa kuwa yenye kiwango cha juu cha ubora kwenye masuala ya udhibiti barani Afrika.

Mkutano huo ulikuwa ukijadili utafiti na mapendekezo ya taasisi ya Ufaransa ijulikanayo kama Européenne de Technologies et de Services (AETS) ambayo inatoa misaada ya kiufundi na kuzijengea uwezo mamlaka za udhibiti na kufadhiliwa na EU.

Tangu mwaka jana EU imekuwa ikitoa msaada kwa Jukwaa la Mamlaka za Udhibiti za Afrika (AFUR), ambapo EWURA ni mwananchama. Utafiti huo ulihusisha nchi za Tanzania, Cameroon, Namibia, Niger, Cote d’Ivoire, Uganda, Kenya, Ghana, Zambia, na Senegal.

AFUR, jukwaa ambalo linashughulikia ukuzaji wa viwango vya mamlaka za udhibiti barani Afrika, mwaka jana kwa msaada wa EU ilimwajiri mshauri kufanya utafiti wa mlinganisho wa viwango, gharama za huduma, mifumo na gharama za uendeshaji wa mamlaka mbalimbali barani Afrika. Utafiti huo pia ulilenga kuangalia mfumo na kanuni za kupanga gharama na utawala bora wa mamlaka hizo.

Katika mkutano huo uliowakutanisha wataalamu zaidi ya 100 kutoka nchi 30 za Afrika, Mshauri Mkuu wa AFUR, Bw. Pascal Habay aliipongeza EWURA kwa kuongoza katika maeneo ya uwazi, kutoingiliwa, gharama ya huduma za jamii na uwazi na mfumo mzuri wa kupanga gharama za huduma.

Akiwasilisha matokeo ya utafiti huo, Bw. Habay alisifia mfumo mzima wa udhibiti ndani ya EWURA ambao uko wazi.

“Uwazi huu katika mfumo wa kupanga gharama unazuia matumizi mabaya ya fedha kwa taasisi zinazodhibitiwa kwa kuwa wanakuwa wanaelewa kuwa matumizi mabaya hayatakubalika wakati mdhibiti anapanga gharama,” alisema.

Katika eneo la Mamlaka za Udhibiti Afrika kutekeleza matakwa ya kuwa na uwazi katika mchakato wa kupanga gharama, utafiti umeonesha kuwa Tanzania imekuwa ikitekeleza kwa kiwango cha kuridhisha.

Akichangia kuhusu hilo, Mkurugenzi Mkuu wa EWURA, Bw. Haruna Masebu alisema mfumo mzuri wa vyanzo vya fedha kwa mamlaka za udhibiti duniani kote ni kuendeshwa kwa tozo na si kodi za serikali.

“Hii hufanyika ili kuinua kiwango cha kujitegemea kifedha  na kuhakikisha kuwa jukumu la kuchangiwa linafanywa na wale wanaotumia huduma zinazodhibitiwa,” aliongeza, Bw. Masebu.

Hata hivyo, pamoja na kuongoza, utafiti baado umeishauri EWURA kuangalia njia bora ya kupanga gharama ambazo ziko chini ukilinganisha na nchi nyingine.