Pinda ataka taarifa za bomoabomoa nchi nzima

Na Theonestina Juma, Bukoba

SIKU chache baada ya kusitisha bomoabomoa kwa waliojenga kwenye hifadhi ya barabara nchini nzima, Waziri Mkuu, Mizengo Pinda amewaagiza wakuu wa
mkoa yote kupeleka taarifa ya barabara zinazojengwa kwenye maeneo yao ili kubaini ni nyumba ngapi zitakazoathirika na bomobomoa hiyo.

Agizo hilo limetolewa jana na Waziri Pinda wakati wa majumuisho ya ziara yake ya siku nane mkoani hapa, wiki moja baada ya kupindisha agozo la Waziri wa Ujenzi, Dkt. John Magufuli la kutaka kubomua nyumba hizo bila kulipa fidia kwa kuwa ni kinyume cha sheria.

Bw. Pinda alisema taarifa hizo kutoka kwa wakuu wa mikoa zinahitajiwa haraka iwezekanavyo, lengo likiwa ni kutaka kujua orodha ya nyumba zitakazoathirika na bomoabomoa hiyo kwa mujibu wa utaratibu kabla na baada ya sheria kubadilika.

Alisema taarifa hizo ziwe za maeneo ya vijijini na mijini ambapo kwa mjini, awali sehemu ya hifadi ya barabara ilikuwa ni mita 22 na baadaye ikaongezwa hadi mita 30.

Alisema majengo mfano kama ya makanisa au msikiti huenda yalijengwa zaidi ya miaka 20 iliyopita baada ya kuomba ardhi na kupewa, na leo kuibuka na kuambia kuwa majengo hayo yako kwenye maeneo ya hifadhi ya barabara na kutakiwa wabomoe ni suala ambalo linahitaji umakini wa hali juu ikiwa ni pamoja na kutoa elimu na mashauriano.

“Hebu fikiria kama eneo la hifadhi ya barabara kuna majengo ya makanisa kama Lutheran, Roman Catholic, msikiti … halafu maaskofu wa makanisa hayo pamoja na sheikh wapangane kuja kwako kulalamikia suala hilo, wakati waliomba ardhi na kupewa na serikali hiyo hiyo ambayo ina sheria hiyo inayozuia ujenzi katika eneo hilo, unafanyaje? ni taabu tupu ...ahh...ngoma hapo,”alisema Bw. Pinda.

“Bababara za mji kupanuliwa hadi mita 30, mfano kama mji huu wa Bukoba mnafikiri utahamia wapi kwa sababu baadhi ya majengo yalioko ndani ya mita hizo, katika maeneo ya mijini ni kama vile mabenki na majengo makubwa ya serikali, yabomolewe hadi jengo la Uhamiaji...ndiyo maana nasema inahitaji kuangaliwa upya.

“Hapa inahitaji maelewano makubwa kweli kweli…. naamini baada ya muda mfupi tutakuwa tumeshapata taarifa zote kutoka kwa wakuu wa mikoa na wataweza kuja na jambo ambalo litaweza kufaa katika mazingira walionayo,” alisema.

Alisema sababu ya kutakiwa maelewano na kutoa elimu zaidi kwa wananchi ni kwa sababu serikali ndiyo imewaacha watu wakajenga katika maeneo hayo huku wakijua wazi kabisa kuwa sheria ipo na walitakiwa kuwazuia wasindelee kujenga kwani sheria inayokuja leo ni kwa ajili ya vizazi vijavyo.

Ufafanuzi huo umekuja ili kujibu malalamiko ya wananachi na hasa wachambuzi wa masuala ya kisiasa ambao wamekuwa wakimlaumu kwa kupindisha amri ya Dkt. Magufuli hadharani, hatua iliyotafsiriwa kuwa serikali haina kauli moja.