Timbe awacharukia wachezaji Yanga

Na Zahoro Mlanzi

KOCHA Mkuu wa timu ya Yanga, Sam Timbe, amewajia juu wachezaji wake kwa kusema hawajitumi, hivyo nafasi ya kutwaa ubingwa itategemea na
watakavyobadilika.

Kauli hiyo aliitoa mara baada ya kumalizika kwa mchezo kati yao na JKT Ruvu uliomalizika kwa suluhu, juzi kwenye Uwanja wa Uhuru, Dar es Salaam.

Timbe alisema nafasi ya kutwaa ubingwa bado ipo, lakini kwa jinsi inavyocheza timu yake, itakuwa ngumu kwani hakuna anayeonesha kwamba,  anahitaji kutwaa ubingwa.

"Kiukweli wachezaji wangu hawajitumi, kwani kama uliungalia kwa makini mchezo, utagundua hilo, hii suluhu haimaanisha ubingwa ndio basi, hapana, tuna nafasi ya kutwaa endapo wachezaji watataka kutwaa," alisema Timbe.

Alisema huwezi kuwaombea mabaya wapinzani wako, kama mwenyewe unashindwa kutengeneza mazingira mazuri,ana uhakika michezo iliyobaki wakishinda yote na mpinzani wao, Simba kupoteza mmoja, watatwaa ubingwa.

Naye, Mwenyekiti wa klabu hiyo, Llody Nchunga, alisema timu yake ilipata nafasi nyingi za kufunga, lakini wachezaji wake hawakuwa makini katika umaliziaji.

"Kitu cha msingi kwa sasa ni kushirikiana kwa pamoja ili kuhakikisha tunatwaa ubingwa, matokeo hayo yamewashangaza makocha, mashabiki na wanachama wetu, kwani hakuna aliyetarajia kupata matokeo haya," alisema Nchunga.

Akizungumzia matokeo hayo na hali halisi ndani ya klabu hiyo, alisema hali iliyopo ndani ya klabu haihusiani na matokeo, kwani viongozi hawachezi mpira, wao wanahusika na utawala na kuhakikisha maandalizi yanakwenda vizuri.

Kwa matokeo hayo, Yanga imefikisha pointi 40 huku vinara wa ligi hiyo, Simba, ikiwa na pointi 44, timu zote hizo zimebakiwa na michezo mitatu.

Yanga imebakiwa na Azam FC, African Lyon na Toto African, huku Simba ikibakiwa na JKT Ruvu, Majimaji ya Songea na Kagera Sugar.