CUF yavivyooshea kidole vyombo vya habari

Na Benedict Kaguo

NAIBU Katibu Mkuu wa Chama cha Wananchi (CUF), Bw. Julius Mtatiro amedai kuwa baadhi ya vyombo vya habari hapa nchini vimeandaa mkakati wa
kukidhoofisha na badala yake kukijenga Chama cha Demokrasia na Maendeleo (CHADEMA) ili kionekane chenye uwezo wa kuongoza nchini.

Alisema pamoja na kejeli nyingi zinazotolewa na CHADEMA dhidi ya chama chake, CHADEMA kimekuwa kikipata nafasi kubwa kwenye vyombo vya habari na kuwadanganya Watanzania kwamba ndicho kinachoweza kuleta mabadiliko ya kweli hapa nchini.

Akihutubia mkutano wa operesheni zinduka katika Uwanja wa Zakhem, Mbagala, Dar es Salaam juzi, Bw. Mtatiro alisema baadhi ya vyombo vya habari vimekuwa vikitoa taarifa ya kupotosha umma kwa kutumia propaganda zinazotolewa na chama hicho dhidi ya CUF.

Alisema ni jambo la kusikitikisha kuona CHADEMA kinaendelea kuishambulia CUF kwa kuiita 'CCM B' badala ya kuikabili CCM lakini baadhi ya vyombo vya habari, bila kuvitaja, vinashindwa kuwaeleza ukweli wananchi juu ya siasa za nchi zinavyokwenda badala yake vimejikita kwenye ushabiki.

Bw. Mtatizo pia aliishambulia CHADEMA kuwa ndiyo yenye uhusiano na CCM kwa kuwa imekuwa ikipokea misaada kutoka kwa wana-CCM, kama Mfanyabiashara Bw. Mustapha Sabodo, na kimekuwa kikiwapokea vigogo wanaokihama chama hicho tawala.

"CHADEMA wamekuwa wakipokea misaada mingi kutoka kwa vigogo wa CCM, mnakumbuka ni juzi tu hapa kada wa CCM Sabodo alitoa milioni 100/- kwa CHADEMA na misaada mingine mingi ambayo haitangazwi, lakini sisi CUF hatujawahi kuwaita CCM B hata siku moja, vigogo wa CCM wanakimbilia CHADEMA na kugombea, hatujasema ni CCM B, lakini leo CUF kuingia kwenye Serikali ya Umoja wa Kitaifa Zanzibar ndio tumekuwa CCM B, na vyombo vya habari vipo haviwaelezi ukweli Watanzania," alisema Bw. Mtatiro.

Alisema uhuru wa vyombo vya habari unapaswa kutumika vizuri ili kuwawezesha Watanzania kutambua mustakabali wa taifa lao hasa katika ukuaji wa demokrasia ya kweli.

Awali, Mbunge wa Wawi, Bw. Hamad Rashid Mohamed alisema wakati akiwa kiongozi wa kambi ya upinzani bungeni alikubali kushirikiana na CHADEMA kwa kumpa nafasi ya Naibu Kiongozi wa Upinzani Dkt. Willibrod Slaa lakini leo CHADEMA wameunda kambi ya upinzani wanakataa kushirikiana na CUF kwa madai kuwa kwa upande wa Zanzibar wanashirikiana na chama tawala.

"Ndugu zangu chama kilichoshindwa kuwaunganisha watu, kikipewa madaraka kitaongoza kidikteta kwa hiyo nawaomba Watanzania muiogope CHADEMA kama ukoma kwani hakina lengo la kuwasaidia zaidi ya kuchochea ubaguzi," alisema Bw. Rashid

Huku akinukuu gazeti moja la kila siku(sio Majira) Bw. Hamad alisema wakiwa mikoa ya Kanda ya Ziwa, viongozi wa CHADEMA walitamka hadharani kumpa siku 9 Rais Jakaya Kikwete kuwajibika na kueleza kuwa yaliyotokea Misri yanaweza kutokea nchini.

Alisema kauli hizo hazina nia njema kwa Watanzania kwani amani iliyopo ikitoweka viongozi wa CHADEMA watapanda helkopta na kukimbia na kuwaacha wananchi masikini wakipoteza maisha.

"Sisi CUF tunaamini kuwa tutaindoa CCM madarakani sio kwa mawe, bali kwa hoja nzito za kuwaunganisha wananchi kuwashawishi wakiamini chama chao na hatimaye waweze kukipigia kura kwenye uchaguzi," alisema.

Kwa upande wake Mwenyekiti wa CUF, Profesa Ibrahim Lipumba alisema CCM imegawanyika mapande wawili na pande moja likiona mambo ni magumu linakimbilia CHADEMA na kuwaeleza Watanzania waungane kukiunga mkono CUF ili kuongoza mapambano dhidi ya ufisadi.

"Ndugu zangu CCM imegawanyika mapande mapande, pande moja linataka kukimbilia CHADEMA na ndio maana vigogo wa CCM wanaisadia mamilioni na wengine kwenda kugombea huko. Kama kuna Watanzania wanaoamini chama cha manyangumi wa ufisadi kinaweza kuleta mabadiliko, ni bora waende Loliondo wakanywe kikombe cha babu maana watakuwa wagonjwa wa akili," alisisitiza Prof. Lipumba.