Majira yazindua kamati kuchochea maendeleo Kagera

Na Theonestina Juma, Bukoba

KAMPUNI ya Business Times kupitia gazeti lake la Majira imezindua kamati ya kuchochea na kufuatilia maendeleo ya Mkoa wa Kagera, ambapo
Bw. Yusto Muchuruza amechaguliwa kuwa mwenyekiti akisaidiwa na Bw. Edward Tibihenda.

Uzinduzi wa kamati hiyo ambayo wajumbe wake waliteuliwa na wakazi wa Kagera wanaoishi Dar es Salaam na kupata Baraka kutoka kwa wakuu wa wilaya za mkoa huo, ulifanyika mjini hapa jana. Wajumbe waliohudhuria mkutano huo walikuwa 11 kati ya 14.

Akizungumza baada ya kuchaguliwa katika wadhifa huo, Bw. Muchuruza alipongeza mpango ulioanzishwa na Kampuni ya Business Times kwa kuwa unalenga kuchochea maendeleo ya jamii mkoani wa Kagera.

“Kagera ina raslimali nyingi, ikiwemo raslimali watu, kila mwana Kagera angetoa asilimia moja ya mapato yake, Kagera ingezidi Jiji la London,” alisema, Bw. Muchuruza.

Alisema chini ya mwelekeo huo mpya wa Majira uwezekano wa kufaulu upo, na kwamba kinachotakiwa ni kila mmoja kutimiza wajibu wake.

Bw. Muchuruza alisema kati ya wajumbe waliopendekezwa kuunda kamati hiyo hakuna hata mmoja aliye kinyume na mawazo ya Sekretarieti ya Majira ambayo ndiyo inaratibu mpango huo.

 “Mtegemee kuwa jamii nzima itakubali mpango huu… mimi napenda kufanya kazi, tufanye kazi ili tuweze kufanikiwa…hatuendelei
kwa sababu siri ni moja ni kwa kuwa hatufanyi kazi,” alisisitiza Bw. Muchuruzi.

Alitoa mwito kwa wajumbe wa kamati hiyo kuepuka kutekeleza majukumu yao kama wapelelezi. Alishauri mkakati wa kuhamasisha maendeleo ya mkoa huo usiwalenge wana-Kagera wanaoishi Dar es Salaam tu bali hata wale waliopo mikoa mingine na nje ya nchi.

Kwa upande wake, Makamu Mwenyekiti, Bw. Tibihenda alipongeza Majira kuanzisha mpango huo kwa kuwa mambo mengi yanayofanyika kwenye vijiji vyao hayafahamiki.

Aliahidi kushirikiana na wana-kamati kutekeleza majukumu yatakayokuwa mbele yake ili kazi hiyo iweze kufanyika kikamilifu.

“Tunapaswa kujitahidi ili wale waliotuamini waone kazi imefanyika inavyotakiwa…tuondoke hapa tukionekana tumebeba mzingo mkubwa wa kuponyesha wale waliotuteua,” alisema Bw. Tibihenda.

Awali mwakilishi wa Business Times Ltd, Bw. Arnold Kimanganu akizungumza kwa niaba ya Mkurugenzi wa Kampuni ya Business Times, Bw. Rashid Mbuguni, alisema dhamira ya maendeleo kwa wana Kagera si jambo kipya, hivyo haziwezi kupotea bali litabaki kuwa deni litakaloendelea kuwazonga wananchi wa Kagera hadi hapo watakapofanikiwa.Alisema chombo cha Majira kitasaidia kuunganisha nguvu za wakazi
wa Kagera.

Alisena itakuwa chachu tu ya kujumuisha mipango na nguvu za ndani na nje ya mkoa, kuhamasisha jamii na kuisaidia kuondoa vikwazo vinavyokwamisha na kurudisha nyuma jitihada za maendeleo.