Msimamo CHADEMA wamtikisa Makinda.

*Ni wakutomtambua Rais Kikwete.
*Awaita Mbowe, Zitto wateta. 

Na John Daniel, Dodoma.
SPIKA wa Bunge Bi. Anne Makinda, amewashauri wabunge wa Chama Cha Demokrasia na Maendeleo (CHADEMA) kufuta msimamo wao wa kutoitambua Serikali na
Rais Jakaya Kikwete kwa kuwa msimamo huo unaweza kuwagharimu katika uwakilishi na utumishi wao ndani ya chombo hicho cha kutunga sheria.

Akizungumza na waandishi wa habari juzi usiku baada ya kukabidhi majukumu yake kwa Naibu Spika, Bw. Job Ndugai, Bi. Makinda alisema baada ya kupata taarifa za wabunge wa CHADEMA kutoitambua Serikali na Rais Kikwete aliwaita viongozi wa wabunge hao, Bw. Freeman Mbowe na Zitto Kabwe ofisini kwake kuwapa ushauri wa kufuta msimamo huo kwa kuwa madhara yake ni makubwa kwao kiutendaji.

"Unajua usipoitambua serikali maana yake ni kwamba huwezi kufanya kazi yoyote ndani ya bunge, zipo kamati nyingi, kuna nafasi mbalimbali za uwakishi wa wabunge katika taasisi, mashirika, vyuo na nje ya nchi sasa kama hawaitambui serikali maana yake hawawezi kuwakilisha katika nafsi yoyote.

Nimewashauri wafikirie upya, wakumbuke hata CUF kule Zanzibar waliwahi kufanya hivyo na katika kipindi chote cha miaka mitatu hawakuwakilisha katika nafasi yoyote na walikaa kana kwamba hawapo, kwa maana hiyo hawawatendei haki wananchi waliowachagua," alisema Bi. Makinda.

Alisema alifikia uamuzi wa kukutana na viongozi hao kuwapa ushauri kwa kuwa hakuna sababu ya mbunge kudai kuwa hatambui serikali iliyopo madarakani wakati anahudhuria vikao vyote vya bunge linaloongozwa na kuendeshwa na serikali hiyo hiyo anayodai si halali.

Alisema tayari wabunge hao wa CHADEMA wameapa na kuahidi kutii na kuilinda Katiba ya Jamhuri ya Muungano wa Tanzania inayoitambua na na kutii serikali iliyopo mdarakani na kuongeza kuwa kutomtambua rais ni kupoteza muda au kutafuta umaarufu wa kisiasa.

Alisema baada ya Uchaguzi Mkuu na matokeo yote kutangazwa hadharani kazi kubwa ya wabunge sasa ni kuacha malumbano ya kisiasa na kuungana pamoja bila kujali itikadi kutatua kero za wananchi na kutekeleza ahadi mbalimbali walizotoa wakati wa kampeni.

"Niliwashauri kwa kuwa malumbano hayo hayatatufikisha popote, pengine watu wanajitafutia tu umaarufu, lakini kazi ya mbunge ni kuwakilisha wananchi, sasa ukibaki kuimba tu hatumtabui Rais haisadii," alisema Bi. Makinda.

Akizungumza na Majira kwa njia ya simu jana, Bw. Mbowe alikiri kukutana na Spika Makinda kufanya mazungumzo lakini si kwamba waliitwa kujadiliana kuhusu kubadilisha msimamo wao.

"Kwanza sisi hatujaitwa na Spika wala sijui suala la yeye kutushauri kitu kama hicho. Sikiliza nikuambie, hatukwenda bungeni kutafuta vyeo wala manufaa yoyote, mimi mwenyewe nimeendesha siasa kwa miaka 20 bila kupata manufaa yoyote, hatuwezi kununua vyeo kwa kumtambua rais.

"Unajua huku Bara hatujawahi kupata 'Political Pressure'
(shinikizo la kisiasa), wamezoea tu mambo yanaenda vibaya tunakubali haya bora liende, sasa hatuwezi kuendelea hivyo, kule Zanzibar walipata 'Political Pressure' ndio maana leo kuna serikali ya Umoja wa Kitaifa, usifikiri kwamba ule muundo unapendwa na CCM, wamelazimishwa na 'Political Pressure' baada ya kuona hali si shwari," alisema Bw. Mbowe.

Alisema wao kama Chama cha Demokrasia na Maendeleo, njia pekee ya kueleza masikitiko yao kwa njia ya demokrasi ni kutoa tamko kama walivyotoa juzi ya kutoitambua serikali kwa kuwa katiba iliyopo sasa inawanyima haki ya kufanya jambo lolote zaidi ya hapo.

"Kama ukiibiwa kwenye ubunge unaweza kufungua kesi na mahakama ikatoa hukumu ukapata haki yako, lakini kwa upande wa urasi Jaji Lewis Makame (Mwenyekiti wa Tume ya Taifa ya Uchaguzi) akishatangaza mshindi awe ndiye au siye basi, hauna nafasi ya kukata rufaa wala kwenda popote sasa njia pekee tunayoweza kutumia ni kutoa tamko kuonesha kile tunachokiamini, tunahitaji tu ukweli si kukubali kirahisi rahisi,"alisema Bw. Mbowe.

Alisema yeye pamoja na msaidizi wake Bw. Kabwe pamoja na Mnadhimu wao Bw. Tundu Lissu, walimtafuta Spika Makinda kwa kutaka ufafanuzi kuhusu kanuni za Bunge na kwamba hawakuzungumzia suala la msimamo wao kama ilivyoelezwa na kiongozi huyo wa shughuli za Bunge.

Alipoulizwa msimamo wao kama watapewa ushauri huo alisema wao kama CHADEMA wameacha milango wazi kwa mtu yeyote kuwapa ushauri na kwamba msimamo wao utatokana na aina ya ushauri na hoja  zitakazotokana na ushauri huo.

"Sisi hatujafunga milango kupokea ushauri wa mtu yeyote kuhusu msimamo wetu, tutapokea na kuufanyia kazi ushauri, lakini kwa sasa hatuwezi kusema eti kutomtambua Rais sasa wabunge wetu wasikae bungeni hapana,'alisema Bw. Mbowe.