Mbatia wahi mahakamani-Mdee.

Na John Daniel, Dodoma

MBUNGE wa Kawe kupitia Chama cha Dermokrasia na Maendeleo (CHADEMA), Bi. Halima Mdee amevunja ukimya na kumtaka aliyekuwa mgombea ubunge wa
jimbo hio kupitia Chama cha NCCR-Mageuzi, Bw. James Mbatia kuharakisha kwenda mahakamani.

Akizungumza na Majira mjini hapa jana, Mbunge huyo alisema anasikitishwa na hatua ya Bw. Mbatia kudai kuwa ushindi wake si halali na kumtaka awahi mahakamani ili akamvue nguo kwa kuanika mbinu zake za kumsaliti, licha ya wote kutoka kambi ya upinzani.

"Ninachosema ni kwamba Mheshimiwa Mbatia kama anataka kwenda mahakamani awahi, kwanza atathibitisha kuwa yeye ni pandikizi aliyetumwa kunivurugia ushindi, lakini pia nitaweka hadharani mambo aliyonifanyia ambayo niliamua kukaa nayo tu ili yaishe kwa
kuwa wote ni wapinzani," alisema Bi. Mdee.

Alisema wakati wakifanya kampeni jimboni humo alisikia maneno mengi dhidi ya Bw. Mbatia kuwa anafanya kampeni za kummaliza yeye  badala ya kupambana na Chama cha Mapinduzi ambayo ndio alikuwa adui wao mkubwa katika jimbo hilo.

"Hata wewe unajua wazi kuwa adui yetu mkubwa ilikuwa ni CCM kutokana na jinsi ilivyodidimiza maisha ya Wanakawe, lakini nilishangaa mwenzangu badala ya kushirikiana nami kummaliza adui, alikuwa akitaka kunimaliza mimi, ndio maana nasema akifanya hivyo atadhitibisha kuwa yeye ni pandikizi kweli," alisisitiza.

Alisema hivi sasa anajiandaa kuanza kushughulikia kero ya Wanakawe na kusisitiza kauli yake kuhusu maeneo ya wazi yaliyoporwa na wajanja kuwa ni lazima yarejeshwe, vinginevyo wahusika wataishia mkononi mwa vyombo vya dola.

"Hivi sasa ni muda wa Wanakawe kujiandaa kunipa ushirikiano wa kutosha kushughulikia kero zao, nilidhani mwenzangu naye anajiandaa kushirikiana nami kuboresha maisha ya wananchi kumbe anataka kwenda mahakamani, basi awahi ili kuokoa muda," alisisitiza.