Hatutakubali kuteuliwa na Kikwete-CHADEMA.

Na Peter Saramba, Dodoma

CHAMA cha Demokrasia na Maendeleo (CHADEMA) kimetoa msimamo kuwa hakitakubali kushirikishwa kwenye baraza la mawaziri litakaloundwa Chama Cha Mapinduzi (CCM) hata
kama watateuliwa, kwa sababu hakiamini wala kutambua matokeo ya uchaguzi yaliyompa ushindi Rais Jakaya Kikwete.

Akizungumza na waandishi wa habari kwenye ukumbi wa hoteli ya Desert Pub Resort mjini Dodoma jana, Mwenyekiti wa CHADEMA, Bw. Freeman Mbowe alisema chama chake hakitakubali wala kupokea uteuzi wa nafasi ya uwaziri hata kama Rais Kikwete ataamua kumteua mbunge yeyote kutoka chama hicho katika nafasi ya uwaziri.

"Hatuko CHADEMA wala kuingia bungeni kutafuta uwaziri. Siku zote lengo letu ni kusimamia na kupigania haki ya Watanzania kwa kutumia njia sahihi na halali kwa kushinikiza serikali kuongoza kwa kujibu wa mahitaji ya umma. Hatuko hapa (ndani ya chama) kutafuta kushirikishwa kwenye serikali ya CCM.

Tunalenga kueneza sera zetu kwa wananchi na hatimaye kuongoza dola siku zijazo kwa kuungwa mkono na Watanzania kupitia sanduku la kura," alisema Bw. Mbowe katika mkutano ambao mgombea urais wa chama hicho, Dkt. Willibrod Slaa alieleza msimamo wake.

Mwenyekiti huyo aliyekuwa akijibu swali la mmoja wa waandishi aliyetaka kujua iwapo watakubali uteuzi kwenye nafasi ya uwaziri wakati hawatambui ushindi wa Rais Kikwete, alisema wabunge na madiwani wa chama chake watashirikiana na mamlaka zilizopo
kutekeleza majukumu yao kisheria huku wakiendeleza shinikizo la kuwepo mabadiliko katika mfumo wa sheria, katiba na uongozi kwa ujumla.

"Tutakachofanya kama chama cha siasa makini kinachokusudia kushika dola ni kutekeleza majukumu yetu kulingana na sheria mbaya zilizopo huku tukiweka msimamo wetu wazi kuwa hatujaridhika na wala hatutaridhika na namna chaguzi zetu zinavyoendeshwa," alisema Bw. Mbowe.

Akifafanua, alisema kisheria Rais Kikwete ni kiongozi halali wa nchi na hakuna chombo wala mamlaka ya kuhoji au kubatilisha matokeo yaliyompa ushindi hata kama kuna ushahidi wa kuwepo kasoro nyingi katika mchakato wa uchaguzi na utangazaji wa matokea ya kura zilizompa ushindi huo.

Aliwaasa wananchi kote nchini kuiunga mkono CHADEMA katika harakati za kudai uongozi unaojibu mahitaji ya umma badala ya hali ilivyo sasa ambapo viongozi wa chama tawala wanajali zaidi maslahi ya chama chao na kundi dogo la watu wanaotafuna raslimali za nchi kwa njia zisizofaa.

Bw. Mbowe aliahidi kuwa chama chake kitafuata na kuzingatia sheria na katiba katika kutekeleza majukumu yake huku kikiweka kipaumbele kwenye usalama wa nchi, umoja na mshikamano katika jamii na kuwataka wanachama na wapenzi wa CHADEMA kuepuka mambo yote yanayoweza kuhatarisha usalama wao na nchi kwa ujumla.