CHADEMA yalaani kuzuia mikutano.

*Yasema polisi inataka kujenda dola ya kipolisi
*Yatoa sharti kushirikiana na CUF katika bunge

Na Tumaini Makene.
CHAMA cha Demokrasia na Maendeleo (CHADEMA) kimelaani kitendo cha Jeshi la Polisi, kuzuia mikutano ya wabunge wake na mingine ya hadhara ya chama hicho, kikidai kuwa ni
dalili za wazi za 'kuminya haki za raia, kuvunja sheria ya haki, kinga na mamlaka ya bunge na kukaribisha dola ya kipolisi' nchini.

Kimesema kuwa vitendo vya Jeshi la Polisi, vinashiria hatari kwa demokrasia nchini, haki za kikatiba na za kisheria za wananchi, huku kikitoa mifano ya dhana hiyo ya dola ya kipolisi (police state) ni kama vile ilivyokuwa katika nchi za Zimbabwe, Afrika Kusini wakati wa utawala wa makaburu; na Kenya wakati wa utawala wa Rais wa Pili, Daniel Arap Moi.

Kimesema kuwa kama chama kikuu cha upinzani chenye kubeba matumaini ya mabadiliko ya Watanzania walio wengi, hakikubali nchi kufikishwa huko, wabunge wake kunyamazishwa wala bunge kurudishwa kuwa kamati ya chama cha siasa kama ilivyokuwa enzi la chama kimoja.

Akizungumza na waandishi wa habari jana Dar es Salaam, Mkurugenzi wa Sheria, Katiba na Haki za Binadamu wa CHADEMA, Bw. Tundu Lissu alisema kuwa chama hicho kimepokea taarifa za kimaandishi kutoka mikoa na wilaya mbalimbali nchini kwamba Jeshi la Polisi limepiga marufuku mikutano ya hadhara ya wabunge wa CHADEMA katika maeneo kadhaa nchini kwa kutumia sababu mbalimbali kama vile 'taarifa za kiintelijensia' na kuwa baadhi ya vyama vya siasa havina nia njema.

"Taarifa tulizozipata kimaandishi zinaonesha kwamba Jeshi la Polisi limezuia mkutano wa hadhara uliopangwa kufanyika katika viwanja vya Kwaraa, Babati Mjini kwa ajili ya kumpokea Paulina P. Gekul, mbunge wa viti maalumu Mkoa wa Manyara...mkutano wa hadhara Shule ya Msingi Mkendo, mjini Msoma kwa ajili ya kumpokea Vicent Kiboko Nyerere nao umepigwa marufuku.

"Mikutano mingine ya wabunge wa CHADEMA iliyopigwa marufuku na polisi ni pamoja na ule wa Said Arfi (Mpanda Mjini) na Annamary Stella Mallack (viti maalum Rukwa), Peter Msigwa (Iringa Mjini), Joseph Mbilinyi (Mbeya Mjini) na Ezekia Wenje (Nyamagana).

Katika mikutano yote hiyo taarifa zilikwishatolewa na wabunge husika kwa mujibu wa Sheria ya Kinga, Mamlaka na Haki za Bunge. Polisi pia wamezuia mkutano wa kisiasa ulipangwa kufanyika leo (jana) Jimbo la Segerea kwa mujibu wa Sheria ya Vyama vya Siasa," alisema na kuongeza;

"Jeshi la Polisi limetumia visingizio vya 'taarifa za kiitelijensia' (Babati mjini na Musoma mjini), 'baadhi ya vyama vya siasa havina nia njema' (Mpanda Mjini) n.k. kama sababu ya kupiga marufuku mikutano hiyo ya hadhara.

"Mkuu wa Polisi wa Wilaya ya Ukonga, Dar es Salaam amedai kwamba '...mikutano na maandamano ya kisiasa imezuiliwa maeneo yote kutokana na hali ya kiusalama'. Jeshi la Polisi halijatoa ufafanuzi wowote juu ya vyanzo vya taarifa hizo wala kutaja vyama vinavyodaiwa kuwa na nia mbaya."

Bw. Lissu alisema kuwa haki ya wananchi kujumuika na kujadili mustakabali wa nchi yao inalindwa na katiba ya nchi na inatambulika kimatifa na nchi zote zinazoheshimu demokrasia na haki za binadamu, huku akiongeza kuwa kuzuia mikutano ya wabunge ni kuwazuia kufanya kazi zao, hivyo kitendo hicho ni shambulio la waziwazi kwa haki, kinga na mamlaka ya bunge ambazo zinatambulika kimataifa na zinalindwa na katiba na Sheria ya Kinga, Mamlaka na Haki za Bunge (1988).

Akinukuu moja ya vifungu katika sheria hiyo, Bw. Lissu alisema kuwa mbunge anayo haki ya kufanya mikutano ya hadhara na mamlaka zote husika zitatakiwa kuwezesha mikutano hiyo kufanyika kwa namna itakayomfaa mbunge kwa kadri inavyowezekana kwa mazingira yaliyopo, huku akiongeza kuwa kwa mujibu wa sheria hiyo ni kosa la jinai, chini ya sheria hiyo, kwa mtu yeyote kuzuia mikutano hiyo kufanyika na anaweza kushtakiwa na mamlaka husika.

"Kama kweli kuna 'taarifa za kiintelijensia' juu ya tishio la usalama katika mikutano hiyo, kama inavyodaiwa na polisi, basi jukumu lao kuhakikisha usalama wa kutosha unakuwepo badala ya kuzuia wabunge kufanya kazi zao na kuvunja katiba na sheria za nchi yetu...vitendo vya polisi vinaashiria hatari kubwa kwa demokrasia nchini kwetu na kwa haki za kikatiba na kisheria za wananchi wetu.

"Jeshi la Polisi linapoanza kupiga marufuku wananchi kujumuika pamoja kwenye mikutano ya hadhara ni mwanzo wa kuielekeza nchi katika dola ya kipolisi mithili ya Zimbabwe ya Robert Mugabe, Kenya ya zama za Daniel arap Moi na Afrika Kusini ya wakati wa Makaburu...linapopiga marufuku mikutano ya wabunge majimboni kwao ni mwanzo wa kupiga marufuku mijadala huru bungeni na kuielekeza nchi katika utawala wa kiimla, kama si udikteta wa kijeshi.

"Kama chama kikuu cha upinzani chenye kubeba matumaini ya mabadiliko ya Watanzania walio wengi, CHADEMA haiwezi kukubali nchi yetu kugeuzwa kuwa Zimbabwe ya Afrika Mashariki. CHADEMA haiwezi kukubali wabunge wake kunyamazishwa na bunge letu kurudishwa kuwa kamati ya Chama Cha Mapinduzi kama ilivyokuwa miaka ya chama kimoja. CHADEMA haiwezi kukaa kimya wakati haki za wananchi zinazotambuliwa na kulindwa zinakanyagwa."

Wakati huo huo, Bw. Lissu alitoa ufafanuzi wa kisheria namna mabadiliko ya 10 ya Katiba ya Zanzibar ambavyo yanatishia hatma ya Muungano wa Jamhuri ya Tanzania, kati ya Zanzibar na Tanzania Bara, ambapo alisema kuwa ili kuwepo na muungano wa dhati baina ya vyama vya upinzani, hususan CHADEMA na CUF, ni vyema wenzao wa CUF wakaweka bayana msimamo wao juu mabadiliko hayo, akidai yamevunja Katiba ya Tanzania, wazi wazi.

Bw. Lissu ambaye pia ni Mnadhimu Mkuu wa Kambi ya Rasmi ya Upinzani Bungeni, alisema kuwa mabadiliko hayo 'ni ukiukwaji wa wazi katiba ya muungano na kutishia usalama wa nchi na mipaka ya Jamhuri ya Muungano wa Tanzania, kama zilivyoungana Aprili 26, 1964'.

Bw. Lissu alikuwa akijibu swali juu ya msuguano uliopo sasa, hususan katika uundaji wa kambi ya pamoja ya upinzani bungeni, hasa kwa kushirikiana na Chama cha Wananchi (CUF) ambapo alisema kuwa ni vyema watu wanaposhirikiana wakawa na mahali pazuri pa kuanzia hasa katika masuala ya msingi ya kitaifa kama hilo la uvunjaji wa Katiba ya Tanzania, ambayo bado inatambua Tanzania ni nchi moja, yenye sehemu mbili Tanzania Bara na Zanzibar.

"Ndoa ya CCM na CUF, maridhiano ya mwafaka CUF na CCM yaliyopelekea marekebisho ya 10 ya Katiba ya Zanzibar ni ukiukwaji wa waziwazi na wa makusudi wa Katiba ya Jamhuri ya Muungano wa Tanzania, kwa mujibu wa katiba, baada ya muungano Tanzania ni nchi moja, sasa mwafaka umerudisha nchi mbili, maana Zanzibar nayo ni nchi kwa mujibu wa ibara 3 ya mabadiliko hayo.

"Kifungu hicho cha 3 kinasema kuwa Zanzibar ni nchi ambayo mipaka yake ni eneo lote la Visiwa vya Unguja na Pemba pamoja na visiwa vidogovidogo vilivyoizunguka bahari yake ambayo kabla ya Muungano wa Tanganyika na Zanzibar ikiitwa Jamhuri ya Watu wa Zanzibar...Kifungu cha 4 chenyewe kinasema kwamba Zanzibar ni miongoni mwa nchi mbili zilizounda Jamhuri ya Muungano wa Tanzania.

"Wakati Katiba ya Jamhuri ya Muungano bado inatambua kuwa Tanzania ni nchi moja na ni Jamhuri ya Muungano...Eneo la Jamhuri ya Muungano ni eneo lote la Tanzania Bara na eneo lote la Tanzania Zanzibar, na ni pamoja na sehemu yake ya bahari ambayo Tanzania inapakana nayo...mabadiliko yale hayatambui vyote hivi...yameondoa pia mamlaka ya Rais wa Tanzania kugawa mikoa ya Zanzibar, mabadiliko yanamwita Rais wa Zanzibar kuwa ni mkuu wa nchi ya Zanzibar, head of state...

"Pia hata suala la mahakama ya rufaa ambalo linatambulika katika katiba ya nchi kuwa ni la muungano katiba mabadiliko ya Katiba ya Zanzibar haitambuliki tena...wamefuta rufaa kutoka mahakama kuu kwenda Mahakama ya Rufaa ya Tanzania, sasa baada ya CCM na CUF kujitangazia uhuru wao Zanzibar, tungependa kujua msimamo wao juu ya mambo haya ya ukiukwaji, kuchanwa chanwa kwa katiba na kutishia kwa usalama wa nchi.

"Baada ya hayo ajenda ya CUF Tanzania bara sasa ni ipi, ni vyema wakasema msimamo wao ni upi ili twende sawa, maana iko siku tunaweza kupeleka hoja bungeni kuomba kuchunguzwa kwa nani hasa alihusika katika kuvunja katiba sasa wao watasimamia wapi.

"Unajua tunaweza kusahau tukasamehe makovu sijui ya uchaguzi na vitu vingine lakini haya ni mambo ya msingi kwa taifa, ili tushirikiane vyema ni bora tuelewane katika mambo kama haya," alisema Lissu.