Mgombea Ubunge CHADEMA ahamia CCM

Na Wilhelm Mulinda, Mwanza

ALIYEKUWA mgombea ubunge Jimbo la Sumve, mkoani Mwanza, kwa tiketi ya Chama cha Demokrasia na Maendeleo (CHADEMA), katika Uchaguzi Mkuu mwaka 2010, Bw. Milton Rutabana, amejiunga na Chama Cha Mapinduzi (CCM).

Akizungumza na waandishi wa habari Jijini Mwanza jana mbele
ya Katibu wa CCM wa Wilaya ya Nyamagana, Bw. Deogratius Rutabana, alisema ameamua kukihama chama hicho kutokana
na matumizi mabaya ya ruzuku inayotolewa na Serikali.

“Sikuridhishwa kabisa na matumizi ya chama hiki ambacho kila mwezi kinapata ruzuku ya mamilioni ya fedha kutokana na wingi
wa wabunge wake lakini zinaishia tu Makao Makuu ya chama Dar es Salaam badala ya kwenda hadi ngazi za chini,” alisema.

Aliongeza kuwa, kitendo hicho ni sawa na kuwaibia wananchi kwani fedha hizo zinapaswa kutumika katika shughuli za maendeleo ya wananchi na kuendeleza chama katika ngazi mbalimbali nchi nzima.

Bw. Rutabana alisema CHADEMA kina matatizo katika mfumo wake wa uongozi ndio maana viongozi wake wa kitaifa wamekuwa wakijichukulia uamuzi bila kuhusisha ngazi za chini.


“Mwenyekiti wa CHADEMA Taifa, Freeman Mbowe, mapema mwaka huu aliwavua uanachama madiwani wawili Bw. Henry Matata wa Kata ya Kitangiri na Bw. Adam Chagulani wa Kata
ya Igoma jijini hapa bila kuhusisha vikao vya chama katika
ngazi husika,” alisema Bw. Rutabana.

Alisema hali hiyo inaonesha ni jinsi gani chama hicho kisivyo
na viongozi wanaostahili kupewa nafasi ya kushika dola kwani wanaweza kuleta matatizo kutokana na uroho wa madaraka.

Alisema kitendo cha Katibu Mkuu wa chama hicho, Dkt. Willbrod Slaa kumiliki kadi mbili za vyama tofauti vya siasa moja ya CCM na CHADEMA, kinaonesha viongozi wa chama hicho ni mamluki na kwamba kasoro hizo zinatosha kumfanya ajiondoe.