Kafulila kaponzwa na ubishi -Mbunge

*Asema amemshauri mara nyingi lakini hakusikia
*Afananisha tukio hilo la kihistoria na 'sikio la kufa'
*NCCR: kumpoteza mbunge gharama, hatuna jinsi
*Kafulila: Nilitokwa machozi kuwakumbuka wananchi

Mbunge wa jimbo la Kigoma Kusini, NCCR Mageuzi, Bw. David Kafulila, akiingia ndani ya gari lake, kwa ajili ya kuondoka Makao Makuu ya chama hicho, Dar es Salaam jana, baada ya kuvuliwa Uanachama.

 Na Rehema Mohamed

SIKU moja baada ya kikao cha dharura cha Halmashauri Kuu ya Taifa (NEC), ya Chama cha NCCR-Mageuzi, kumfukuza uanachama Mbunge wa
Kigoma Kusini Bw. David Kafulila, Mbunge wa chama hicho Jimbo la Kasulu Mjini Bw. Moses Machali, ametetea uamuzi huo kuwa ni sahihi.

Bw. Machali aliyasema hayo Dar es Salaam jana katika mkutano na waandishi wa habari ulioitishwa na chama hicho ili kutoa taarifa juu ya uamuzi uliofikiwa katika kikao hicho.

Alisema uamuzi wa kumfukuza Bw. Kafulila ndani ya chama hicho pamoja na wenzake ni sahihi akifananisha uamuzi huo na msemo wa wahenga kuwa 'sikio la kufa halisikii dawa'.

“Kafulila ni rafiki yangu mkubwa, nimewahi kumsihi mara nyingi kuhusu mwenendo wake lakini hakutaka kunisikia, kutokana na hali hii, itabidi anisamehe maana mimi huwa sipendi tabia za kinafiki.


“Wiki hii (iliyopita) kati ya Jumanne au Jumatano, Kafulila alionekana katika baadhi ya vyombo vya habari ambavyo ni TBC1 na ITV akisema chama hiki kinatekeleza matakwa ya chama tawala CCM, kimsingi hata mimi nimechukukia,” alisema.

Alisema matamshi hayo ni kashfa kubwa kwa chama hicho na yeye binafsi kama Bw.Machali.

“Inaniuma sana kumpoteza mbunge mwenzangu Bw. Kafulila lakini sina jinsi, huu ni utaratibu ambao umefuatwa kama zilivyo taratibu nyingine,” alisema Bw. Machali.

Aliongeza kuwa, Bw. Kafulila kama ataona ameonewa, anaweza kukata rufaa katika Kamati Kuu ya chama hicho au ngazi nyingine zinazostahili.

Alisema kosa alilofanya Bw. Kafulila ni kuzungumza mambo ya chama kinyume na utaratibu tena katika vyombo vya habari na yeye mwenyewe kukiri kutenda kosa hilo baada ya kuhojiwa na NEC.

“Kafulila alikiri kumchafua Mwenyekiti wa Taifa, Bw. James Mbatia, chama chetu kimefikia hatua hii kutokana na baadhi ya watu kutofuata kanuni na taratibu zilizowekwa,” alisema.

Wengine waliofukuzwa katika chama hicho ni Bw. Hashim Rungwe, ambaye aliwahi kugombea nafasi ya Urais katika uchaguzi Mkuu mwaka 2010 kupitia chama hicho, Kamishna wa chama hicho Mkoa wa Tanga na Mjumbe wa Halmashauri Kuu, Bw. Mbwana Hassan na Bw. Yothamu Lubungira ambaye alikuwa Kamisha wa chama hicho Mkoa wa Tabora.

Akizungumzia uwamuzi huo, Katibu Mkuu wa NCCR- Mageuzi, Bw. Samuel Ruhuza, alisema uamuzi huo unamfanya Bw. Kafulila kukosa sifa ya kuwa Mbunge wa jimbo hilo kupitia chama hicho.

Alisema chama hicho kimechelewa kuchukua uwamuzi huo kwa kile alichoeleza kuwa ni kufanya mawasiliano ya mara kwa mara na Bw. Kafulila na kumshauri abadilike lakini haikuwezekana.

“Chama chochote cha siasa siasa kinafuata kanuni na taratibu walizojiwekea, hakuna mmiliki wa chama, hakuna bifu kati ya Mwenyekiti wetu Bw. Mbatia na Bw. Kafulila, kumpoteza mbunge mmoja kati ya wanne ni majonzi sana, ni sawa na kukatwa mkono au mguu.

“Kumpoteza mbunge ni gharama kwetu kwa sababu tutaingia katika uchaguzi mdogo, najua itakuwa majonzi kwa wenzetu wa Kigoma Kusini lakini tunaomba wasikwazike, tumelifanya hili kwa nia njema kabisa,” alisema Bw. Ruhuza.

Aliongeza kuwa, Bw. Kafulila na wenzake wana siku 14 za kukata rufaa kupinga uamuzi huo kama watahitaji kufanya hivyo.

Bw. Ruhuza alisema, hatua inayofuata sasa ni chama hicho kuwaandikia barua rasmi ya kuwavua uanachama na kupeleka taarifa rasmi katika mamlaka husika na kazi hiyo itafanyika leo.

Kwa upande wake akizungumzia uamuzi huo, Bw. Kafulila alisema sababu kubwa iliyomfanya atokwe machozi katika kikao cha NEC ni baada ya kuwakumbuka wananchi wa jimbo lake.

“Nimefanya mengi na nina mipango mingi ya kuwasaidia wananchi wa Kigoma katika nyanja mbalimbali, ufumbuzi wa tatizo hili utapatikana kwa njia ya mazungumzo au sheria za nchi,” alisema Bw. Kafulila.