Wanafunzi 400 watimuliwa UDOM

Na Waandishi Wetu

SIKU moja baada ya serikali kutangaza kukubali kuwalipa posho ya mafunzo kwa vitendo wanafunzi wa Chuo Kikuu cha Dodoma (UDOM), uongozi wa chuo hicho
umewatimua wanafunzi takriban 400 kwa kuchochea mgomo.

Hatua hiyo ilifikiwa jana saa 10 jioni baada ya uongozi wa chuo hicho kudai kubaini njama za wanafunzi hao kushawishi wenzao kufanya mgomo kutaka kuvuruga ratiba ya mitihani kuanzia Juni 20, kuwapiga wenzao, na kuvunja mlango wa darasa la kitivo cha sayansi asilia.

Wakizungumza na Majira kutoka chuni hapoa jana, baadhi ya wanafunzi walisema hali ni tete katika eneo hilo na kwamba waliofukuzwa sasa wamekuwa mwiba mkali kwa wenzao huku wakizuia daladala kufika katika eneo hilo kwa madai kuwa ingewezesha kuwaondoa wakati wakitaka washinikize serikali kuwasikiliza kwanza.

Makamu Mkuu wa Chuo hicho, Profesa Idris Kikula, alisema wamefikia hatua ya kuwafukuza wanafunzi hao ambao wengi wao ni wa mwaka wa pili wanaochukua kosi ya Ushirikiano wa Kimataifa kutokana na kuonekana kuwa vinara wa mgomo.

"Haya mambo ya kuwapiga wenzao, kutaka kuchochea vurugu wamenza tangu mchana, wameng'oa miti tuliyopanda hapa chuoni, wanawapiga wenzao wanaoingia darasani na wamevunja mlango wa darasa.

Hatuwezi kuacha kufanya fujo hivi katika eneo la taaluma, lakini kibaya zaidi serikali imeshatoa tamko, serikali ilinituma mimi jana usiku na kueleza kuwa imekubali itatoa fedha kwa ajili ya mafunzo kwa vitendo na kwao hapa UDOM ni special case (suala mahususi), lakini hawakusikiliza," alisema Prof. Kikula.

Alisema juzi usiku alifanya mazungunzo na viongzoi wa wanafunzi hao na kuwaomba wakawajulishe wenzao huku wakishinikiza Waziri wa Elimu, Dkt. Shukuru Kawambwa kutoa majibu hayo mbele ya wanafunzi wote huku dalili zikionyesha si salama.

"Mhe Dkt. Kawambwa alikuja akazungumza na viongozi wa wanafunzi na tukawapa taarifa kwamba pelekeni ujumbe kwamba serikali imekubali, sisi baada ya kuona watu wanapigwa hatuwezi kuruhusu hali kama hiyo na wale vinara tunawaondoa, ni wale wa mwaka wa pili wa International Relation, wote waliokamatwa na polisi jana (juzi) wakiandamana, walivunja sheria na wote waliochochea, tumewaondoa jumla yao kama 400 hivi," alisema Prof. Kikula.

Alipoulizwa hatua zitakazochukuliwa na chuo kuhakikisha wanafunzi hao wanaondoka kutokana na taarifa kwamba wamegoma kufanya hivyo na wanatafuta uwezekano wa kupata ushirikiano kutoka kwa wenzao alisisitiza kuwa lazima waondoke.

"Sisi tusingependa kufikia hatua ya kuwaondoa lakini kwa kuwa wameshafikia pabaya ni lazima waondoke tu, hata kama hawataki, tutawaita mmoja mmoja kuja kujitetea ambaye utetezi wake utaridhisha atarudi, ila kwa sasa lazima waondoke ili tufanye mtihani wetu kama ilivyopangwa," alisema.

Alisema fedha hizo zitaingizwa na serikali kabla ya muda wa kuanza mafunzo hayo na kwamba kwa mujibu wa maelezo serikali ilikubali kuchukua jambo hilo mahususi kuhakikisha wanafunzi hao wanaendelea na masomo bila kukwama.

Kauli ya Waziri Kawambwa

Siku moja baada ya wanafunzi wa UDOM, kuandamana wakitaka kupatiwa mafunzo kwa vitendo kozi zote ambazo hazikuwekwa kwenye utaratibu huo serikali imekubali madai yao na kuanzisha mpango wa mpito utakaowawezesha kupata mafunzo hayo kuanzia mwaka huu wa masomo.

Mpango huo wa mpito utawasaidia wanafunzi wa Chuo cha Sanaa na Sayansi Jamii na Skuli ya Sayansi Asilia na Hisabati chuoni hapo ulikubaliwa kwa pamoja na serikali pamoja na Tume ya Vyuo Vikuu (TCU).

Mpango huo pia utazithamini rasimu za mitaala ya kozi hizo na kufanyiwa kazi zaidi ili zifikie viwango vya kukubalika kuwa na mafunzo kwa vitendo.

Akizungumza na waandishi wa habari jana, Waziri wa Elimu na Mafunzo Stadi, Dkt. Shukuru Kawambwa, alisema wanafunzi hao na wengine nchini watapata fedha zao kwa ajili ya mafunzo kwa vitendo mapema kabla hawajaanza baada ya mhula wa mwaka wa masomo 2010/2011 kumalizika.

Alisema wanafunzi wa Chuo cha Sanaa na Sayansi za Jamii na Skuli ya Sayansi Asilia na Hisabati UDOM walifanya maandamano kudai wanafunzi wote katika program zote 13 za chuo hicho ambazo hazikuwa na mafunzo kwa vitendo waingizwe katika utaraitibu huo.

Alisema TCU imefanya tathmini ya rasimu za mitaala iliyowasilishwa na kubaini kuwa programu hizo zinatakiwa kufanyiwa kazi zaidi ili ziweze kufikia kiwango cha kuweza kukubalika kuwa mafunzo kwa vitendo na kwamba serikali imebaini kuwepo kwa hitaji la kutoa miongozo katika eneo la mafunzo kwa vitendo ili kuweka utaratibu wa mafunzo hayo utakaotumiwa na vyuo vikuu vyote nchini.

Alisema pamoja na TCU kuwasilisha maamuzi yake serikali kwa kutumia busara zaidi imeamua kuwa na mpango wa mpito ambao utawawezesha wanafunzi hao kufanya mafunzo kwa vitendo katika mwaka wa masomo
2010/2010.