Robinho amhadharisha Neymar

RIO DE JANEIRO, Brazil

MSHAMBULIAJI Robinho De Souza, amemshauri Neymar kufikiria mara mbili kabla ya kufikia uamuzi wa kutaka kuhamia katika Ligi Kuu England kwani anaamini kuwa
mchezaji huyo wa Brazil, anafaa zaidi kuchezea timu ya Barcelona.

Chelsea imebakia kuwa timu yenye nafasi ya kupata saini ya Neymar, mwenye umri wa miaka 19 licha ya ofa yake ya pauni milioni 25 kukataliwa Agosti, mwaka huu lakini mshambuliaji huyo wa Santos amekuwa akitakiwa na timu nyingi za Ulaya.

Robinho amekiri kwamba kwake ilikuwa ni bora angejiunga na Chelsea kuliko Manchester City, wakati alipoondoka Real Madrid kwa ada ya pauni milioni 32.5 mwaka 2008, lakini anaamini Neymar ambaye ni kiungo aliye juu katika Santos na Paulo Henrique Ganso wasiende kucheza katika Ligi Kuu.

"Ninafikiri kuwa wachezaji wote wako tayari kuondoka Brazil, kwa kuwa wako katika levo tofauti," alisema mshambuliaji huyo wa AC Milan ambaye anacheza kwa mkopo Santos.

"Wana ubora. Inahusu kujiunga na timu sahihi, ambayo inaheshimu ubora wa mchezaji. 

"Kwa Neymar na Ganso, ninafikiri watafanya vizuri Hispania na Italia. Fikiria Neymar kuchezea Barcelona, akiwa na Lionel Messi na David Villa. Mungu Wangu!

"Kuendelea kuwa bora zaidi, watalazimika kuchagua kwa kuwa wanaweza kubadilisha aina ya uchezaji wao."

Mpelelezi Mkuu wa Barcelona, Alberto Valentin walimwona Neymar akichezea Brazil katika mashindano ya Marekani Kusini ya chini ya miaka 20 Februari mwaka huu na kisha walikwenda tena kumwangalia Sao Paulo Mei.