Kikwete asaini Mpango kabla ya kupitishwa

Na Tumaini Makene

MPANGO wa Kwanza wa Maendeleo wa Miaka Mitano (2011/12-2015/16), umewasilishwa rasmi bungeni, huku wabunge wakianza kuuchambua, ambapo
imehojiwa sababu za Rais Jakaya Kikwete kuusaini, kisha kulishukuru bunge kwa kazi yake ya kuupitisha, kabla hata haujawasilishwa kwa ajili ya kujadiliwa na kuridhiwa na bunge.

Akiuwasilisha mswada huo mbele ya bunge jana, Waziri wa Nchi Ofisi ya Rais,
Mahusiano na Uratibu Bw. Steven Wassira, alisema;

"Kwa mujibu wa Katiba ya Tanzania ya Mwaka 1977, Ibara ya 63(3)c, inaelekeza kuwa kwa madhumuni ya utekelezaji wa madaraka yake, bunge laweza-kujadili na kuidhinisha mpango wowote wa muda mrefu au muda mfupi unaokusudiwa kutekelezwa katika Jamhuri ya Muungano, na kutunga sheria ya kusimamia utekelezaji wa mpango huo."

Akiwasilisha maoni ya Kambi Rasmi ya Upinzani Bungeni, Mbunge wa Karatu, Mchungaji Israel Natse, akinukuu kifungu hicho hicho cha katiba, alisema;

"Mheshimiwa Spika kwanza kabisa napenda kuwasilisha masikitiko ya Kambi ya Upinzani kuhusiana na  mpango huu...wakati katiba ikitamka hivyo, mpango huu tayari ulishasainiwa na Rais wa Jamhuri ya Muungano ya Tanzania tangu tarehe 7 Juni 2011 na kuwasilishwa bungeni tarehe 8 Juni, kama hati ya kuwasilisha mezani, bila kuelezwa ndani ya mpango wenyewe kama kilichowasilishwa ni rasimu.

"Aidha kwa mpango wenyewe, rais tayari ameshashukuru wadau kwa maoni yao
yaliyowezesha kukamilisha mpango na ameshalishukuru bunge kwa mchango katika
kukamilisha mpango husika. Mheshimiwa Spika wakati Rais anasema hivyo, Kambi ya Upinzani Bungeni haijawahi kushirikishwa wala kushiriki kikao chochote cha bunge kilichojadili na kupitisha mpango huu.

"Kwa hiyo Kambi ya Upinzani inamtaka waziri aeleze ni kikao kipi cha bunge na ni mkutano wa ngapi wa bunge, uliowahi kujadili na kupitisha mpango huu wa maendeleo na hata kumpelekea mheshimiwa rais kulishukuru bunge kupitia dibaji yake iliyochapwa kwenye kitabu cha mpango huu."

Mchungaji Natse alisema kuwa Kambi ya Upinzani inalitaka bunge kufanya kazi zake kikamilifu, huku akiitaka serikali kuuhesimu mhimili huo wa serikali, isiwe na utamaduni wa kuamini kuwa kila jambo litakalowasilishwa bungeni litapitishwa, hivyo akasema ni muhimu maoni yatakayotolewa na wabunge yaingizwe na yafanyiwe kazi.

Suala hilo la Rais Jakaya Kikwete kusaini rasmu ya mpango huo, kisha kulishukuru bunge, kabla hata haujaingia bungeni ulianza kuzua maswali tangu wakati wa semina ya wabunge na Tume ya Mipango, Ijumaa wiki iliyopita, ambapo mmoja wa wabunge alihoji kwa nini imekuwa hivyo na iwapo maoni yao yataingizwa katika kitu ambacho kinaonekana kuwa kimeshapitishwa.

Huku akipinga pia matumizi ya lugha ya kiingereza katika suala muhimu kama hilo kwa maendeleo ya taifa kwa miaka mitano ijayo, kwani hautaweza kufahamika kwa Watanzania takriban asilimia 80, Mchungaji Natse aliongeza pia kuwa ni ajabu mpango huo kutozingatia katiba mpya.

Mbali ya hayo, mapema Bw. Wassira aliliomba Bunge kupokea na kujadili mapendekezo ya mpango huo, ili kuridhia utekelezaji wake, kulidhia mapendekezo kuwa mwaka wa fedha 2011/12 uwe ni kipindi cha mpito katika utekelezaji wa mpango huo ili kutoa fursa  kwa mpango kuanza kutekelezwa kikamilifu kuanzia mwaka wa fedha 2012/13. Pia liridhie vipaumbele vya mpango huo na mapendekezo ya rasilimali zinazohitajika kuutekeleza.

"Maeneo ya kipaumbele na malengo ya utekelezaji kwa kipindi cha miaka mitano ni yafuatayo; miundombinu, hasa upatikanaji wa nishati ya umeme toshelevu na ya uhakika kwa mahitaji ya ndani na kuuza katika nchi jirani. Sanjari na hili, mkazo umewekwa katika kuimarisha miundombinu ya usafirishaji, hasa bandari, reli na barabara kuiwezesha Tanzania kuwa lango kuu la kibiashara na huduma kwa nchi jirani zisizo na bahari.

"Malengo ya utekelezaji ni kuongeza uzalishaji wa umeme kufikia 2780 MW; kuboresha njia za usafirishaji umeme na usambazaji; kujenga barabara za lami zenye urefu wa km 5,205; kuongeza uwezo wa kuhudumia mizigo bandarini kufikia tani 9.87 milioni na usafiri wa anga kusafirisha tani 35,500," alisema Bw. Wassira.