Kauli ya JK yawashangaza viongozi wa dini, wanasiasa

Na Dunstan Bahai

BAADHI ya viongozi wa dini na wanasiasa nchini wameishangaa kauli ya Rais Jakaya Kikwete kwamba viongozi hao wanajihusisha na biashara ya dawa za kulevya bala
ya kuwakamata.

Viongozi hao kwa nyakati tofauti walisema kama kweli kauli hiyo ina ukweli, ni kwamba serikali inawajua wahusika hivyo kuhoji kwa nini isiwakamate na badala yake Rais anaishia kulalamika kwenye majukwaa.

Juzi wakati akihutubia waumini wa Kanisa Katoliki Jimbo la Mbinga kwenye ibada maalum ya kupewa daraja la Uaskofu na kusimikwa kwa Mhashamu Askofu John Ndimbo wa jimbo hilo, Rais Kikwete aliwataka viongozi wa dini kuacha kushiriki kwenye biashara ya kuuza dawa za kulevya na badala yake washirikiane na serikali katika kuidhibiti.

Katibu Mkuu wa Shura ya Maimamu Tanzania, Bw. Ponda Issa Ponda alisema kauli ya Rais inaashiria kuwa yeye (Rais) na watendaji wake (serikali) wanawajui wafanyabiashara hiyo haramu.

"Mimi nashindwa kuelewa, kitendo hicho ni kosa, na sheria inapovunjwa haiangalii huyu ni kiongozi wa dini au la, inachukua mkondo wake dhidi ya watu hao," alisema.

Alisema kabla ya Rais kutoa kauli hiyo aliyoiita ni ya kulalamika kwa wananchi, alitakiwa kuwakamata kwanza hao viongozi wa dini kisha kuuambia umma wa Watanzania kuwa nao wanajihusisha na biashara hiyo.

Bw. Ponda alisema kuwa viongozi wa dini ni sehemu ya serikali, hivyo haipaswi kiongozi wa serikali kuwalaumu, bali kama wanafanya makosa, sheria ichukue mkondo wake.

Mmoja wa maaskofu wa Kanisa Anglikana Tanzania ambaye alikataa kutajwa jina lake gazeti kwa vile si msemaji wa kanisa hilo, alizungumza kwa masikitiko kwamba Rais amewadhalilisha na kuwakosea adabu.

"Kwa kweli Rais ametudhalilisha, hakututendea haki kabisa, ametukosea heshima kwani alichotakiwa ni kumtaja huyo anayedhani anajihusisha na biashara hiyo, lakini si kutaja kwa ujumla wetu," alisema.

Askofu huyo alisema wao ni watu wa heshima na wanaoheshimiwa na jamii na hasa ikizingatiwa pia kuwa wanaisadia serikali katika kuwaongoza wananchi katika njia iliyo nyofu, hivyo hawajui hatma yao mbele ya jamii hiyo inayowaamini.

Mwenyekiti wa Chama cha Wananchi (CUF), Profesa Ibrahim Lipumba alisema kama rais anapata ujasiri wa kusema hayo, iweje asiwachukulie hatua za kisheria kwani hayo ni makosa ya jinai ambayo adhabu zake hazichagui kiongozi wa dini, serikali au mwananchi wa kawaida.

Alisema serikali haiko makini katika vita dhidi ya dawa za kulevya kwani aliyekuwa mbunge wa viti maalumu Marehemu Amina Chifupa, alijitoa mhanga katika kuisaidia serikali kuwafichua wafanyabiashara hao haramu, lakini serikali haikumtumia hadi akafariki dunia.

Bw. James Mbatia, Mwenyekiti wa NCCR-Mageuzi, alisema mfumo wa uendeshaji serikali ni wa kifisadi, kwani hata viongozi wamejawa na ubinafsi na ndiyo maana hata sheria hazisimamiwi ipasavyo.

"Rais ameendelea kuimba ngonjera kila siku, leo kawataja viongozi wa dini, kesho ni wewe mwandishi, siku nyingine waganga wa kienyeji. Kama anawajui anasita nini kuwachukulia hatua," alihoji Bw. Mbatia.

Alimshauri Rais kutumia madaraka yake kuwachukulia hatua badala ya kulalamika kama wananchi wa kawaida.