Bob Rudala awa kivutio Kalunde Band

Na Mwandishi Wetu

MWIMBAJI mpya wa bendi ya Kalunde, Bob Rudala mwishoni mwa wiki alikuwa kivutio katika maonesho ya bendi hiyo, yaliyofanyika katika kumbi za
Trinity hoteli Oysterbay na Jovich uliopo Kawe Beach.

Bob Rudala ambaye awali alitamba na bendi ya In Afrika, aliweza kuwashika vilivyo mashabiki wa bendi hiyo waliohudhuria maonesho hayo.

Katika Onesho la Trinity, ambalo lilihudhuriwa na mashabiki lukuki mwimbaji huyo aliweza kutamba katika nyimbo mpya za bendi hiyo za Fungua, Masumbuko na Sisee.

Licha ya kutamba na nyimbo hizo, Kalunde pia iliweza kutumbuiza nyimbo zao za zamani zilizopo katika albamu ya Hilda.

Akizungumzia kuhusu kuja kivingine na kuingia katika soko la muziki nchi mara baada ya maonesho hayo Rais wa bendi hiyo, Deo Mwanambilimbi alisema huo ni mwanzo lakini bado kuna mambo mengi mazuri yanakuja.

Alisema baada ya kukamilisha nyimbo tatu, hivi sasa wapo katika hatua za mwisho za kukamilisha nyimbo nyingine tatu kwa ajili ya kukamilisha albamu yao ya pili.

"Baada ya kumnasa Bob Rudala katika bendi yetu, hivi sasa tupo katika hatua za mwisho kukamilisha nyimbo nyingine tatu ambazo zitachanganywa na alizokuja nazo Rudala," alisema Mwanambilimbi.