Ancelotti akubali kipigo cha Liverpool

LONDON, England

KOCHA Carlo Ancelotti, amekiri kwamba timu yake ya Chelsea ilicheza chini ya kiwango, wakati ilipokutana na mahasimu wao
Liverpool katika mchezo wa Ligi Kuu ya England.

Blues iliingia uwanjani juzi kukutana na Reds, ikiwa na matumaini ya  kupunguza pengo la pointi kumi kati yake na vinara wa ligi hiyo, Manchester United, lakini ikashindwa kufanya hivyo baada ya kujikuta ikilala kwa bao 1-0 katika mchezo uliofanyika Uwanja wa Stamford Bridge.

Kabla ya mchezo huo, Ancelotti alikuwa na matumaini makubwa baada ya kuweka  rekodi ya kumsainisha, Fernando Torres na kumchezesha dhidi ya mwajiri wake wa zamani lakini, Mhispania huyo akashindwa kuonesha makali yake hatimaye Blues wakalazimishwa kukubali kushindwa, ingawa wanaona walinyimwa penalti.

"Nadhani madhambi aliyofanyiwa Branislav Ivanovic, ilikuwa ni penalti, tunakubali kwamba hatukucheza vizuri," Ancelotti aliiambia Sky Sports.

"Tunatafakari kiwango cha mwamuzi na chetu. Hatukucheza vya kutosha ili kushinda mechi hii, hatukuweza kutengeza nafasi za mashambulizi," alongeza.

Katika mechi hiyo ya juzi, Torres alitolewa uwanjani dakika ya 65 na nafasi yake ikachukuliwa na Salomon Kalou lakini,  Ancelotti alisema uamuzi wa kumtoa mshambuliaji huyo ambaye amemnunua kwa kitita cha pauni milioni 50 ni kutokana na sababu za kiufundi.

"Nilitaka kubadili mfumo. Ilikuwa mechi yake ya kwanza na dakika 65 alizocheza alicheza vizuri. Haikuwa kazi rahisi kwa sababu hatukuweza kutengeneza nafasi. Tulikuwa tukicheza taratibu kuanzia nyuma hivyo hakukuwepo uwezekano kwa washambuliaji wetu kucheza kwa kasi," alisema.