Ongala amshukia mwamuzi

Na Speciroza Joseph

LICHA ya kikosi chake kupata ushindi wa 3-1 dhidi ya Miembeni, Kocha Msaidizi wa Azam FC, Kali Ongala amesema mwamuzi wa mchezo huo hakuwa sawa katika baadhi ya maamuzi yake.

Ongala alitoa kauli hiyo mara baada ya kumalizika kwa mchezo huo ambapo alisema kama sio ubora na uwezo wa wachezaji wake wasingeweza kushinda mchezo huo kwa kuwa walionewa mara nyingi na mwamuzi wa mchezo huo.

Mchezo huo uliokutanisha timu ya Bara Azam FC na Miembeni kutoka visiwani ilichezeshwa na mwamuzi Ally Omary Kisaka aliyelalamikiwa na upande wa timu zote.

"Siku zote tunaamini timu yenye uwezo kushinda lazima hata kama watakatishwa tamaa na waamuzi, na timu mbovu lazima ifungwe, wanachofanya waamuzi ni sawa na kuua soka kwa kupendelea timu fulani tena waziwazi." alisema Ongala.

Kocha huyo mwenye uraia wa Uingereza aliongeza kuwa timu yake ilitendewa madhambi ya wazi lakini mwamuzi aliacha tu, lakini walipofanya wapinzani wao timu yake ilionekana kutenda makosa.

Ongala alisema anashukuru kushinda na kuonyesha kwamba wao wana kila sababu ya kushinda kwa kuwa wamefunga mabao halali na kila mtu ameyakubali.

Azam FC itamaliza mchezo wake wa hatua ya makundi leo dhidi ya Mtibwa Sugar kwenye Uwanja wa Amaan visiwani hapa, akizungumzia mchezo huo Kali alisema wanahitaji ushindi ili wasonge mbele na wamejiandaa kupambana.