Madaktari waanza kuigomea Serikali

*MAT: Hatarudi nyuma hadi mawaziri wang'oke
*Amana huduma zasimama, Muhimbili hali tete
*Waomba radhi wananchi, wasema nia yao nzuri

Rais Jakaya Kikwete (kushoto), akikabidhi Ripoti ya Utawala Bora iliyoandaliwa na Mpango wa Kujitathmini Kiutawala Bora (APRM), Tanzania kwa kiongozi wa Jopo la Wataalamu wa Masuala ya Utawala Bora (CRM) Afrika, Bw. Akere Muna, ambao wapo nchini kwa ajili ya kupitia ripoti hiyo na kutoa mapendekezo juu ya hatua muhimu zinazopaswa kuchukuliwa na Serikali. (Picha na Tagie Mwakawago).
Rehema Maigala na Rachel Balama
MADAKTARI nchini wameanza mgomo usiokuwa na kikomo kama walivyokuwa wameazimia baada ya Rais Jakaya Kikwete kukataa kuwaondoa kazini Waziri wa Afya na Ustawi wa Jamii, Dkt. Haji Mponda na Naibu wake, Dkt. Lucy Nkya.

Mgomo huo umeanza ikiwa ni siku moja tangu Waziri Mkuu, Bw. Mizengo Pinda, atangaze msimamo wa Rais Jakaya Kikwete, kuwa hawezi kuwaondoa mawaziri hao kwa shinikizo la madaktari hao.

Kuanza kwa mgomo huo kumesababisha huduma kusimama kwa zaidi ya asilimia 80 kwa baadhi ya hospitali huku vitengo vya mapokezi ya wagonjwa vikiwa havina watu.

Wakati mgomo huo ukiwa umeanza kwenye baadhi ya hospitali nchini, jijini Dar es Salaam viongozi wa Chama cha Madaktari Tanzania (MAT) wamesema madaktari kote nchi wataendelea na mgomo hadi pale Serikali itakaposalimu amri na kuwafukuza kazi mawaziri hao.

Akizungumza na waandishi wa habari jijini Dar es Salaam jana Rais wa MAT, Dkt. Namala Mkopi, alisema; "Tumesikitishwa na kauli ya Waziri Mkuu (Pinda) ya kusema kuwa hafahamu dai la wao kutaka mawaziri hao waondolewe na badala yake anasema ni dai jipya."

Alisema Februari 9, mwaka huu katika mkutano wao na Bw. Pinda, waziri huyo alisema anaanza kwa kuwawaibisha Katibu Mkuu wa Wizara ya Afya na Ustawi wa Jamii, Bi. Blandina Nyoni na Mganga Mkuu wa Serikali, Dkt. Deo Mtasiwa, ili kupunguza migogoro iliyotokea.

Dkt. Mkopi aliongeza kwamba kwa upande wa mawaziri, Bw. Pinda aliwaambia kuwa kwa kuwa viongozi hao ni wa kisiasa suala hilo atalifikisha kwa Rais.

Alisema kitendo cha serikali kushindwa kulifanyia kazi dai lao hilo, kumewafanya kukosa uvumilivu.

"Kama kuvumilia, tumeishavumilia mwezi mmoja sasa ni bora ingekuwa mshahara tungevumilia kwani tunajua bajeti bado lakini kwa hawa mawaziri (Dkt. Mponda na Dkt. Nkya) wanaoonekana machoni hatukubali kurejea kazini."

Alisisitiza kuwa mgogoro huo usingefika hapo ulipo kama busara ingetumika. "Serikali itumie utawala bora kuwaondoa hao mawaziri," alisema. Alienda ndani zaidi kwa kufichua siri kuwa mgomo huo umeanza baada ya kupata baraka kutoka kwa madaktari bingwa ambao walikuwa na mkutano juzi asubuhi.

Kwa msingi huo alisema mgomo huo una baraka zote kwa kuwa madaktari wamebaini serikali inataka kuingiza siasa kwenye taaluma hiyo nyeti kwa maisha ya binadamu.

Aliwaomba wananchi wasiwaelewe vibaya kwani lengo lao ni kuboresha huduma ya afya nchini, kwani hata wakilazimishwa kwenda kufanyakazi, hakuna kitu kitakachoendelea kwa kuwa hospitali haina vifaa, vitanda wala dawa.

Walipoulizwa mawaziri wakifukuzwa watarejea kazini, madaktari hao walisema; "Mawaziri hao wakiondoka tunarudi kazini mambo mengine tutaongelea mezani...waziri alituahidi kusafisha wizara ya afya, sasa haijasafishika kama mawaziri hao bado wapo ofisini."

***Hali ya utoaji huduma Muhimbili

Hali ya utoaji huduma katika Hospitali ya Taifa Muhimbili (MNH) jana ilianza kudorora kwani wagonjwa wengi waliokuwa wakifika hospitalini hapo walikuwa wanapangiwa tarehe ya mbali kwa madai kuwa madaktari wapo kwenye vikao.

Hali hiyo iliwanyong'onyesha wagonjwa pale walipokuwa wakiondoka hospitalini hapo bila huduma yoyote. Akizungumza na waandishi wa habari Ofisa Uhusiano wa Taasisi ya Mifupa (MOI), Bw. Juma Almasi;

"Ni kweli madaktari leo wapo kwenye vikao ndiyo maana baadhi ya wagonjwa hawakupata huduma, lakini hakuna mgomo wowote unaoendelea," alisema, Bw. Almas.

Hali katika hospitali ya Amana

Katika  Hospitali ya Amana ya Jijini Dar es Salaama mgomo huo ulionekana kuathiri utoaji huduma kwa asilimia zaidi ya 80 na kusababisha wagonjwa kuondoka bila kupata huduma.

Hali hiyo ilisababishwa na madaktari kutokuwepo kwenye vyumba vyao vya kutolea tiba na wale wachache walioonekana walikuwa wakiuliza wagonjwa waliokaa kwenye mabechi kwamba hakuna huduma.

Waandishi wetu waliofika hospitalini hapo walishuhudia wagonjwa waliokuwa wodini wakilalamika kukosa huduma. Wodi zingine zilikuwa na wauguzi peke yao.

Katika wodi ya wajawazito alikuwemo muunguzi mmoja ambaye alikataa kutaja jina lake akifanyakazi ya kupokea wajawazito, japo hakukuwa na watu wa kuwahuduma.

"Tunapokea wajawazito lakini hakuna huduma kwa kuwa madaktari wamegoma, hatuwezi kufanyakazi bila madaktari," alisema muuguzi huyo.

Kwa upande wa eneo wanapokaa wagonjwa wa nje watu waliofika walikuwa wakitangaziwa kwamba hakuna huduma, hivyo kulazimika kuondoka.

Mgonjwa mmoja aliyejitambulisha kwa jina la Maimuna Suleiman, alisema kuwa wodi ya watoto wachanga waliozaliwa wakiwa wanaumwa madaktari hawakupita na mbaya zaidi wagonjwa alikuwa wakiruhusiwa na wauguzi.

Mganga Mkuu wa Manispaa ya Ilala, Dkt. Aisha Mahita, alithibitisha kuwepo kwa mgomo. Hata hivyo alisema Manispaa kwa kushirikiana na uongozi wa hospitali watajitaidi kuhakikisha wagonjwa wa dharura wapata huduma.

Alisema watachukua madaktari waliopo kwenye zahanati na vituo vya afya kwenda kuongeza nguvu Amana.