Wabunge wahofu siasa, hujuma jeshini

Na Waandishi Wetu

BAADHI ya wabunge wameonesha wasiwasi wao kuhusu ulipukaji wa mabomu na kusema kwamba ni uzembe wa serikali hujuma na huenda
siasa zimeingia ndani ya jeshi.

Wabunge hao kwa nyakati tofauti waliyasema hayo wakihojiana na Majira baada ya Spika wa Bunge, Bi. Anne Makinda kuahirisha Kikao cha Bunge akisema kwamba hali inatisha, Watanzania wote wako katika hofu hawajui familia zao ziko wapi, hivyo hawawezi kuendelea na shughuli za bungeni.

Mbunge wa Arusha Mjini, Bw. Godbles Lema (CHADEMA) akitoa maoni yake kuhusu janga hilo alisema kuwa kutokea kwa milipuko ya mabomu mara kwa mara katika kambi za kijeshi ni uzembe wa serikali na inaonesha kuwa ndani yake kuna masuala ya kisiasa.

Alisema kuwa suala hilo linaonesha kuwa kuna mtu anayetafutwa ndani ya uongozi ili aweze kuangushwa na kubainisha kuwa siasa za nchi hii zimeenda ndani zaidi hadi kufikia jeshini.

"Ukifuatilia zaidi unaweza kukuta walinzi wa maghala hayo ya silaha hawajafa au kujeruhiwa na kama itakuwa hivyo, basi kuna walakini kwa sababu walitakiwa kuwa wa kwanza kufa," alisema Bw. Lema ambaye pia ni waziri Kivuli wa Mambo ya Ndani.

Alisema kuwa kumekuwa na tatizo kwa nchi hii pindi inapotokea matukio kama haya serikali inakimbilia kuunda tume na kusema kuwa basi tume hiyo itakayoundwa ichunguze kwa makini zaidi na kubaini kilichotokea.

Naye Mbunge wa Jimbo la Vunjo kwa tiketi ya TLP, Bw. Augstino Mrema kwa upande wake alisema kuwa rais achukue jukumu la kuwawajibisha baadhi ya viongozi wanaosimamia masuala ya kijeshi kwani wameonesha kutowajibika kikamilifu katika kusimamia usalama wa maisha ya wananchi.

Alisema kuwa wananchi walidhani kuwa Serikali ilijifunza kitu kwa tukio la Mbagala la kulipuka kwa mabomu ambayo yaliua watu wengi  lakini inaonesha haikujifunza kitu hivyo wahusika lazima wawajibike.

Alisema kuwa Tanzania ijifunze kwa nchi zingine zilizoendelea kuwa ikitokea hali kama hiyo basi wahusika huwajibika kutokana na matukio kama hayo.

Naye Mbunge wa Jimbo la Wawi (CUF), Bw. Rashid Mohamed alisema kuwa inaonesha kuwa Tanzania haina uwezo mzuri wa kudhibiti silaha.

Alisema kuwa ipo haja kwa serikali kuchukua hatua za dharura kuangalia hali hiyo kwani inaonesha kuwa nchi haiko katika hali nzuri.

"Serikali ambayo ina amani kwanini inakuwa na silaha kama hizo ambazo ni nzito, utunzanji wake unaonesha kuwa si mzuri na umekuwa ukihatarisha maisha ya watu, iliangalie hilo na kujifunza kitu kutokana na matukio," alisema.

Hata hivyo, alisema wananchi walijua serikali ilifanya tathmini na utafiti wa kutosha kwa tukio la Mbagala mwaka juzi na kujifunza kitu ili hali hiyo isijitokeze tena lakini inashangaza kuona kuwa tukio kama hilo linajitokeza tena kwa mara nyingine tena na kupoteza maisha.

Awali Waziri Mkuu Bw. Mizengo Pinda akitoa taarifa ya maafa hayo alisema mlipuko ulianza saa mbili usiku katika maghala ya Jeshi la Ulinzi ambapo maghala 23 yameteketea yakiwa na silaha pamoja na mchanganyiko wa mabomu.

Alisema juhudi zilifanyika na viongozi wa jeshi baada ya milipuko kupungua na kubaini mabweni mawili ya jeshi hilo yaliharibiwa vibaya, magari mawili yaliteketea na watu zaidi ya 17 walifariki dunia.

Bw. Pinda alisema maiti waliofikishwa Hospitali ya Amana ni 13, Muhimbili wawili na Temeke wawili na kati ya maiti hizo tatu waliyoka Kitunda.

Alisema majeruhi 145 hadi asubuhi lakini upo uwezekano wa kuongezeka marehemu na majeruhi baada ya kufanya ukaguzi katika maeneo ambayo usiku hayakufikika.

Waziri alisema zaidi ya watu 4,000 wamehifadhiwa Uwanja wa Uhuru, wakazi waliojirani na maeneo ya matukio wanatakiwa kupisha ukaguzi kujua hali ilivyo.

Alisema kuna mabomu yaliangukia Uwanja wa Ndege wa Mwalimu Julius, walipendekeza uwanja ufungwe kwa muda na ndege zilihadharishwa kutotumia uwanja huo.

"Rais ameitisha kikao cha dharura cha Ulinzi na Usalama wa Taifa na jeshi liunde tume ya kuchunguza tatizo hilo ili kubaini chanzo na hatua stahiki zianze kuchukuliwa," alisema na kuwapa pole wote kutokana na mtikisiko huo.