Mawaziri waikingia kifua serikali

*Kila mmoja apewa dk 10 kueleza mafanikio, mikakati
*Pinda atamba na makusanyo ya bil. 400/- kwa mwezi

Na Kulwa Mzee, Dodoma

MAWAZIRI wa serikali ya Rais Jakaya Kikwete, wakiongozwa na
Waziri Mkuu, Bw. Mizengo Pinda juzi walihitimisha mjadala wa hotuba ya bosi wao kwa aina yake, kwa kila mmoja kupewa dakika 10 kueleza mafanikio na mikakati ya wizara zao na serikali kwa ujumla.

Hotuba hizo zilizovuta zilihitimishwa na Bw. Pinda ambaye alisema Rais Kikwete katika uongozi wake amefanya mambo makubwa, ikiwamo kuiwezesha nchi kupata mapato ya ndani sh. bilioni 400 kila mwezi.

Alisema serikali itaendelea kukuza uchumi kwani kwa miaka mitano Rais ameweza kuiingizia nchi mapato ya sh. bilioni 400 kila mwezi, ambalo ni ongezeko la sh. bilioni 200 katika kipindi hicho.

"Serikali imefanya mengi, sina sababu ya kueleza sekta zote, leo tunalaumiwa kwa kushindwa kukuza sekta ya maji, tuulizane mkoloni aliacha visima vingapi," alisema na kuongeza kwamba tumeongezeka kwa idadi ndio sababu na matumizi ya maji yameongezeka, hata hivyo kuna mikakati mingi ya kuboresha sekta hiyo.

Akizungumzia migomo na maandamano ya vyuo vikuu alisema ufumbuzi unatafutwa ili kuimaliza lakini pia kuna upungufu katika suala zima la utoaji mikopo ambao utafanyiwa kazi na tume hiyo iliyoundwa na Rais Jakaya Kikwete.

Alisema kisheria migogoro hairuhusiwi vyuoni, wanafunzi wakigoma siku tatu mkuu wa chuo anaruhusiwa kuwafukuza chuo.

"Kudai haki kwa migomo na maandamano si utaratibu mzuri, watumie njia ya majadiliano ili kufikia muafaka," alisema.

Alitoa mwito kwa wabunge kujiepusha na jambo lolote la kurudisha nyuma juhudi za serikali kwa lengo la kushika madaraka.

Alisema si busara wabunge kubeza shughuli zao zilizowafanya kuwafikisha hapo walipo, na kuhusu suala la Muungano, aliwaomba wanapojadili mabadiliko yaliyofanyika Zanzibar yawe ya kukuza Muungano badala ya kuuvunja.

Waziri Mkuu aliungana na wale wanaosema Muungano hautetereki ni imara na mabadiliko ya katiba Zanzibar yamehamasisha hisia za umoja, upendo, mshikamano na kuvumiliana.

Akizungumzia hoja zilizotolewa na wabunge alisema mjadala umesaidia kuirahisishai serikali kufanya kazi yake.

Wasira na suala la udini

Waziri wa Nchi Ofisi ya Rais (Mahusiano na Uratibu), Bw. Stephen Wasira aliwashambuliwa wale wanaosema nchi haitawaliki wakati wao wanataka madaraka ya kutawala.

Alisema suala la uhuru na umoja halina chama, akitokea mtu anataka kuuza uhuru watakataa kwa gharama yoyote.

Waziri huyo alisema wanasiasa wanawafuatafata viongozi wa dini wanapoona hawawezi kuchaguliwa bila wao, jambo ambalo hata viongozi hao hawalitaki na wamewataka kuacha kufanya hivyo.

Alisema alikutana na viongozi 70 wa dini mjini Dodoma walililalamikia suala hilo na kuahidi kuimarisha umoja.

"Nimewaambia wakiona mtu kachachamaa sana sababu hajazoea kushindwa, wamwite kanisani au msikitini wamwombee," alisema na kuongeza kwamba wanaounga mkono masuala ya udini ni wale wanaotaka madaraka.

Aliwashauri wabunge kuendeleza misingi waliyoiacha wanasiasa waliowatangulia kwani wangekuwa wachoyo na wadini nchi isingefika hapo ilipo.

Aliendelea kuwashauri wapinzania kwamba sifa ya upinzani ni hoja, wakiamua kutoka katika vipindi vya Bunge, wananchi watawazoea watafika wakati hawatoki wataulizwa mbona hawatoki.

Magufuli na barabara za lami

Ilipofika zamu yake, Waziri wa Ujenzi, Bw. John  Magufuli alitoa hutoba ya kuvutia akitaja barabara zinazojengwa, maeneo zilipo na urefu wake bila kusoma mahali popote, na kutoa ahadi kuwa kzatika miaka minne ijayo barabara zote zitapitika na hakutakuwa na barabara ya changarawe.

Alisema serikali imefanya vizuri katika miradi mikubwa ya barabara, kuna miradi iliyo katika utekelezaji, upembuzi yakinifu na mingine inasubiri kupatikana kwa mkandarasi ili ujenzi uanze.

Bw. Magufuli alisema mtu anaweza kwenda mahali kokote ikiwemo hata kutoka Mtwara kwenda Morogoro kwa kutumia bajaji.

Aliwataka wananchi kuheshimu sheria namba 13 ya mwaka 2007 inayohusu hifadhi ya barabara, waliondani ya hifadhi hawatalipwa fidia wakibolewa kwa mujibu wa sheria hiyo.

"Katika masuala ya barabara hakuna siasa, hakuna CCM, hakuna CUF, hakuna CHADEMA wala chama gani, waliojenga nje ya barabara lazima walipwe kwa mujibu wa sheria, hatakiwi mtu yoyote kuvamia eneo la hifadhi ya barabara," alisema.

Tibaijuna na kero za ardhi

Akichangia kwa upande wa Wizara ya Ardhi, Prof Anna Tibaijuka alisema kuna vipaumbele walivyojiwekea ikiwemo kujadiliana serikali kuweka sera ya kuhakikisha wawekezaji wanazingatia haki za wananchi na ardhi inalindwa.Aliwaomba wabunge na wadiwani kushiriki vikao husika vinavyogawa ardhi kwa wawekezaji kwani wanatambua sheria za ardhi zina upungufu.

Prof. Tibaijuka alisema kero katika ardhi ni nyingi lakini habari njema ni kwamba walishaanza kuzifanyia kazi wamejipanga kwa umakini wanaomba msaada kutoka kwa wananchi na wabunge ili kufanikisha azma yao.
"Watendaji ardhi kama mlikuwa mapumziko yamekwisha, kupanga mji kunataka kujitoa na kufuata sheria kwa maslahi ya Watanzania wote,"alisema.

Nundu kupanua bandari Tanga, Dar

Kwa upande wake Waziri wa Uchukuzi, Bw. Omar Nundu akizungumzia wizara yake alisema sh. bilioni 10 zimetengwa kwa ajili ya kuipanua bandari ya Tanga kufanya kazi ili kusaidia kukuza uchumi.

Alisema bandari ya Dar es Salaam ikiongezwa uchumi pia utaongezeka, wamepanga kuongeza gati namba 13 na 14, bandari itaongezwa na kuchukua sehemu ya Vijibweni na Kisarawe.

Kwa upande wa reli wanatarajia kuboresha usafiri wa abiria na mizigo ni mpango wa mwaka, kwa miaka miwili wanategemea kuwa na treni inayokwenda Mwanza kila siku.Kwa upande wa viwanja vya ndege ujenzi wa terminal three unatarajiwa kuanza mwaka 2011-2012 na uwanja wa ndege wa Songwe Mbeya utakamilika Agosti mwaka huu.

Nahodha na udogo wa Zanzibar

Waziri wa Mambo ya Ndani ya Nchi, Shamsi Vuai Nahodha yeye alionesha kukerwa na kauli kwamba Zanzibar ni ndogo, akifafanua kuwa kama ongozi anaangalia ukubwa wa jimbo au wingi wa wapiga kura, John Mnyika, Mbunge wa Ubungo angekuwa Mwenyekiti wa CHADEMA na Kiongozi wa Upinzania Bungeni kwa kuwa na wapiga kura wengi.

Hoja hiyo imetokana na wabunge wa upinzania hasa CHADEMA kuzungumzia bungeni kwamba Zanzibar ina watu wachache, hoja ambayo iliwakera wachangiaji mbalimbali, waliokuwa wakiitolewa maelezo na kuonya kila walipokuwa wanachangia.

"Leo Mnyika anaongoza watu zaidi ya 450,000 kama ni kuangalia ukubwa basi angekuwa Mwenyekiti wa CHADEMA na Kiongozi wa Upinzania Bungeni," alisema.Alisema siku moja wabunge wa bara wataangalia wenzao wa Zanzibar si kwa udogo wa majimbo bali kwa hoja na mchango wao bungeni.

Waziri Nahodha akizungumzia kuboresha maslahi ya polisi alisema hatua zinachukuliwa kuboresha utendaji kazi wao, kuwapa vifaa na makazi mazuri ili kukidhi ari na motisha.

Pia alisema watawapa mafunzo ya upelelezi ndani na nje ya nchi ili kuzisaidia mahakama kuendesha kesi haraka kwani waliojaa magerezaji asilimia 50 ni mahabusu.

Alisema wanadhamiria kujenga vituo vya polisi kila kata na alikiri kwamba Tanzania ina amani na usalama japo baadhi ya maeneo kuna vitendo na matukio ya uhalifu yanayoweza kuhatarisha usalama.

Waziri alimalizia kwa kusema kwamba watashirikiana na Watanzania kuimarisha amani ya nchi, alisema hata mataifa tajiri yana changamoto za usalama kama zilizopo nchini.