Kambi ya Upinzani: Mwinyi, Mwamunyange wajiuzulu

* Yataka maghala ya silaha yahamishwe maeneo ya raia

Na Reuben Kagaruki

KAMBI ya Upinzani Bungeni imeeleza kushtushwa na taarifa za milipuko ya mabomu katika ghala la silaha la Jeshi la Ulinzi la Wananchi wa Tanzania (JWTZ) na
imeshauri Waziri wa Ulinzi na Jeshi la Kujenga Taifa Dkt. Hussein Mwinyi na Mkuu wa Majeshi ya Ulinzi, Jenerali Davis Mwamunyange kuwajibika kwa kujiuzulu nyadhifa zao.

Msemaji wa Wizara ya Ulinzi na Jeshi la Kujenga wa kambi hiyo, Bw. Joseph Selasini alieleza jana katika taarifa ya kambi hiyo kuwa viongozi hao wanatakiwa kuwajibika kutokana na milipuko ya mabomu iliyotokea Gongolamboto, jijini Dar es Salaam, juzi usiku.

Bw. Selasini alisema; "Dkt. Hussein Mwinyi alikuwa Waziri wa Ulinzi wakati wa maafa ya Mbagala na Jenerali Mwamunyange alikuwa Mkuu wa Majeshi. Maafa ya Mbagala yalitokea chini ya dhamana na au usimamizi wao. Na mara baada ya maafa hayo, Waziri Mwinyi na Jenerali Mwamunyange waliahidi taifa kwamba maafa ya aina hii hayatatokea tena. Sasa yametokea," alisema na kuongeza;

"Ahadi yao ilikuwa sio ya kweli, viongozi hawa hawana budi kuwajibika kwa hiari yao wenyewe au kuwajibishwa kama itahitajika."

Bw. Selasini aliongeza kusema kwamba hadi leo hakuna taarifa yoyote rasmi iliyowahi kutolewa hadharani kwa wananchi au kwa wawakilishi wao bungeni juu ya chanzo cha maafa hayo.

Kambi hiyo imewapa pole ndugu, jamaa na wananchi wote wa Tanzania kutokana na maafa yaliyosababishwa na mabomu hayo.

"Mamlaka zote za umma zinazohusika zichukue hatua za haraka kuhakikisha wananchi wote walioathirika na maafa hayo wanapatiwa huduma zote wanazohitaji katika kipindi hiki," alisema Bw. Selasini.

Alisema ni muhimu kwa vyombo vya usalama kuhakikisha ulinzi wa mali za wananchi katika maeneo yote yaliyoathirika ikiwa ni pamoja na kuwapatia matibabu.

Taarifa ya kambi ya upinzani ilieleza kuwa tukio hilo ni la kushtusha na kusikitisha hasa kwa kuzingatia kuwa haijapita miaka miwili tangu tukio la aina hiyo litokee Mbagala, Dar es Salaam.

Tukio hilo lilisababisha vifo vya zaidi ya watu 30 na uharibifu wa mali.

"Milipuko ya Gongo la Mboto inaonesha dhahiri kuwa Serikali ya Awamu Nne ya CCM haijajifunza lolote kutokana na maafa yaliyotokea Mbagala mwaka juzi," alisema Bw. Selasini na kuongeza;

"Kama Serikali ingejifunza kutokana na maafa hayo ingeshachukua hatua za dharura na za haraka kuhakikisha maafa ya aina hiyo hayatokei tena."

Bw.Selasini alishauri maghala yote ya silaha na mabomu yaliyo karibu na maeneo wanayoishi raia nayahamishwe maeneo wanayokaa raia.

Kambi hiyo imependekeza iundwe tume huru ya uchunguzi au kamati teule ya bunge la Jamhuri ya Muungano wa Tanzania ili kuchunguza kwa kina chanzo cha milipuko ya Gongo la Mboto.

Kaimu Kiongozi wa Kambi ya Upinzani bungeni, Bw. Tundu Lissu alisisitiza hoja hiyo akihoji kama viongozi hao walijifunza kitu ni hatua gani walizichukua ili kudhibiti hali hiyo.

Hata hivyo alisema ubovu wa masuala ya kisera na kiutawala ndiyo yanayosababisha kuwepo kwa matukio kama hayo hali ambapo alihoji kwa nini maeneo kama hayo ya kutunzia silaha yawekwe katika maeneo ya makazi ya watu.

Kutokana na hali hiyo alisema ni wakati mwafaka sasa kwa Waziri wa Ulinzi na Mkuu wa Majeshi wajiuzulu au waachie nyadhifa zao kwani inaonesha wazi kuwa katika usimamizi wao wa masuala ya kijeshi kuwa nchi haiko salama.