Twiga Stars yatinga nusu fainali Zimbabwe

Na Mwandishi Wetu, Harare

TIMU ya taifa ya soka ya wanawake 'Twiga Stars, jana imeendeleza makali yake katika michuano ya COSAFA baada ya kuifunga Zambia mabao 2-0 katika mechi iliyopigwa
Uwanja wa Gwanzura mjini hapa na kuingia nusu fainali.

Katika mechi hiyo Twiga Stars, iliwabana wapinzani wao na kufanikiwa kupata yao kipindi cha kwanza.

Mabao ya Twiga Stars, yote mawili yalifungwa na mshambuliaji Asha Rashid dakika ya 21 na akaongeza lingine dakika ya 33.

Kwa matokeo hayo, timu ya Tanzania imefuzu hatua ya nusu fainali itakayochezwa Julai 7, mwaka huu mjini hapa.

Twiga Stars inatarajiwa kucheza mechi yake nyingine ya kukamilisha ratiba keshokutwa dhidi ya Afrika Kusini katika Uwanja wa Gwanzura mjini hapa.

Tanzania inacheza michuano hiyo ya wanawake ya nchi za Kusini mwa Afrika (COSAFA), ikiwa nchi mwalika ili kunogesha mashindano hayo.