Bhoke wa BBA arejea na kulonga

Na Victor Mkumbo

MWAKILISHI wa Tanzania katika jumba la Big Brother Afrika, Bhoke Egina amerejea nchini baada ya kutolewa katika jumba hilo mwishoni mwa wiki.Akizungumza na
waandishi wa habari Dar es Salaam jana, Bhoke alisema amerejea nchini baada ya kutolewa katika jumba hilo lakini hata hivyo amejitahidi kadri ya uwezo wake mpaka kufika hapo.

Alisema kutokana na kuwa ule ni mchezo na pia una sheria zake, hivyo alipaswa kutoka kutokana na kupata kura chache.

Mwakilishi huyo alisema mambo aliyokuwa anayafanya katika jumba hilo, ndiyo maisha yake halisi kwani hakuwa anaigiza.

Alisema hakupanga kuwa na mahusiano ya kimapenzi na mshiriki mwenzake kutoka Uganda, Ernest lakini hali ilitokea wakati walipowasili katika jumba hilo.

"Kila mtu ana mawazo pamoja na fikra zake mwenyewe kwa hiyo sijutii vitendo nilivyokuwa navifanya na mimi naona nimefanya vizuri, hivyo sijilaumu kwa lolote," alisema Bhoke.

Alisema katika jumba hilo, amejifunza mambo mbalimbali ikiwa ni pamoja na kuishi na watu wa mataifa tofauti tofauti na kujua tabia zao.

Bhoke alisema atatumia nafasi aliyoipata kupambana na changamoto mbalimbali zinazomkabili na kuweza kuzitatua.

Naye Ofisa Uhusiano wa Kampuni ya Multichoice Tanzania, Barbara Kambogi alisema Watanzania hawana budi kuendelea kuwapigia kura washiriki waliopo katika jumba hilo hata kama hakuna mwakilishi kutoka nchini.