Ancelotti ajipa matumaini ya kutwaa ubingwa

LONDON, England

KOCHA wa Chelsea, Carlo Ancelott, amesisitiza kuwa, timu yake inaweza kunyakua ubingwa wa Ligi Kuu ya England, licha ya kulazimishwa sare ya mabao 3-3 na
Aston Villa, na kuwaacha wakiwa nyuma kwa pointi sita dhidi ya Manchester United,  wanaoongoza ligi hiyo.

Chelsea ilikuwa nyuma kwa mabao 2-1, na kuwa mbele kwa mabao 3-2 hadi dakika za mwisho, ambapo mlinzi wa Aston Villa, Ciaran Clark aliisawazisha dakika ya mwisho ya mchezo.

Ancelotti amesema juzi: "Mapambano bado hayajamalizika kwa sababu tunazidi kuimarika, nadhani tunaweza kuwa na usemi msimu huu."

"Kuna pengo dogo kutoka timu inayoongoza, lakini msimu bado ni mrefu na tunaweza kurejea katika hali ya kawaida. Kwa wakati huu kila kitu kipo wazi."

Chelsea imeshinda mchezo mmoja kati ya michezo nane iliyopita ya ligi,  na walikuwa katika shida kubwa kwa muda mrefu wakati Villa walipokuwa wakiwasumbua, katika mechi hiyo, walianza wakiwa pointi moja juu ya shimo la kushuka daraja, walionesha kandanda safi, iliyowafanya Chelsea kufanya kazi ya ziada kutafuta mabao.

Mabingwa hao watetezi, sasa wamefikisha pointi 35, kwa michezo 20, wakishikilia nafasi ya tano.