TARUJUCO yaandaa michuano ya ngumi

Na Mwali Ibrahim

CHAMA cha Waamuzi wa Ngumi za Ridhaa Tanzania (TARUJUCO), kimeandaa mashindano kwa klabu za ngumi za Wilaya ya Kinondoni, ambayo yatafanyika Desemba 20 hadi 23,
mwaka huu DDC Mwenge, Dar es Salaam.

Akizungumza Dar es Salaam jana, Katibu Mkuu wa TARUJUCO Juma Suleiman, alizitaja klabu zitakazoshiriki mashindano hayo kuwa ni Urafiki, Mabibo, Sifa, Miembeni na Ngome.

Nyingine ni Mlimani na DDC Mwenge huku Klabu za Mgulani, TMK na Magereza zikishiriki kama waalikwa katika mashindano hayo.

Alisema mashindano hayo, yatazunguka katika wilaya zote za Dar es Salaam, yakiwa na lengo la kuhamasisha mchezo huo pamoja na mabondia kutambua sheria za ngumi.

"Tunataka kukuza ngumi za ridhaa tukiwa kama chama cha waamuzi, lakini sambamba na kukuza pia kutawasaidia mabondia kufahamu sheria na taratibu za mchezo huo, tutazunguka wilaya zote ili kufanikisha malengo yetu kwa kuanzia na Kinondoni," alisema Sulaiman.

Aliongeza kuwa mchezo wa ngumi una wapenzi wengi, hasa vijana hivyo kwa kufanya mashindano ya wazi kama hayo, yatawasaidia kuhamasika na hatimaye kujiunga na mchezo huo.