SAKATA POSHO YA WABUNGE

 Nchi imetumbukia Baharini- Dkt.Slaa
*Atamani zitumike kulipa madai ya walimu
*Alilia watoto wa maskini kukosa mikopo

Na Rehema Maigala

KATIBU Mkuu wa Chama cha Demokrasia na Maendeleo (CHADEMA) Dkt. Wilbroad Slaa, amelaani vikali kitendo cha Spika wa Bunge, Bi. Anne Makinda, kukiri na kutetea uamuzi wa ofisi yake kupandisha posho za wabunge huku Watanzania wakitaabika na hali ngumu ya maisha.

Kwa mujibu wa Spika Makinda posho hizo za wabunge zimepandishwa kutoka sh. 70,000 hadi 200,000 kwa siku na tayari wameanza
kulipwa.
Akizungumza na gazeti hili jana, Dkt. Slaa alisema kitendo cha spika kuridhia na kutetea kuwapandishia posho wabunge ni kielelezo tosha kuwa nchi imetumbukia baharini na hakuna msaada wa kuiokoa kwa sasa.

Dkt. Slaa aliyezungumza huku akionesha masikitiko alisema, hakutarajia kama spika angetoa kauli hiyo hasa kwa kuzingatia kuwa bunge ni kioo cha nchi na kwamba jukumu lake ni kusimamia serikali na vyombo vyake vyote kwa masilahi ya wanyonge.
Alisema kauli ya Spika Makinda kukiri kuwapandishia wabunge posho ni sawa na kuwavunja matumaini Watanzania na kwamba wanapaswa kujiuliza ni nani wa kuwasaidia ikiwa wabunge wanajisaidia wenyewe.

“Watanzania wengi wanaishi katika hali ngumu kwa sababu ya maisha kupanda, kipato cha Mtanzania kwa siku ni kidogo ambacho hakiwezi kukidhi matumizi yake ya kila siku.
Lakini Mtanzania huyo hana wa kumsemea wala wa kumpunguzia mzigo mzito ili awe na unafuu wa maisha, hana wa kumsaidia ili awe na maisha mazuri hata kidogo,” alisema Dkt.Slaa na kuongeza.

“Watoto wa kimaskini wengi hawaendelei na masomo ya elimu ya juu kwa sababu ya kukosa mikopo kutoka serikalini, kwa nini hizo pesa zilizoongezwa kwa wabunge zisingepelekwa kwa wanafunzi?

Au tunaithibisha ile kauli inayosema kuwa mwenye nacho anazidi kuongezewa?” Alihoji Dkt.Slaa.Alisema wabunge wamekuwa na posho nyingi za kila aina ambazo zingine hata hazistahili kulipwa huku wakiwaacha Watanzania wakiwa na hali ngumu ya maisha.

Alisema kitendo cha Spika Makinda kutetea posho hizo bila kujali maisha ya Watanzania walio wengi ni dalili ya chombo hicho kuwakandamiza wananchi hivyo kwenda kinyume na kazi ya bunge ya kuwatetea wananchi.

Alisema ni aibu kwa wabunge kuongezewa posho bila hata kuwajali wafanyakazi ambao wengi wao wanalipwa mshahara mdogo na kuwataka Watanzania kwa ujumla kutafakari wanatembea katika mstari upi.

Alisema sehemu kubwa ya umaskini wa Watanzania unatokana na viongozi wa serikali kujigawia posho nyingi ambazo hazina maana yeyote kwa taifa.

“Mpaka hivi sasa walimu bado hawajalipwa madeni wanayoidai serikali, wanatishia kugoma ni vyema posho hiyo ingepelekwa kwa walimu ili waweze kutoa elimu bora kwa watoto wetu,” alishauri Dkt.Slaa.

Katika mazungumzo yake na waandishi wa habari juzi wakati akizindua ripoti ya Maendeleo ya Wanawake Duniani kuhusu haki kwa mwaka 2011, Spika Makinda alikiri nyongeza ya posho za vikao vya wabunge kupanda kutoka sh.70,000 hadi 200,000 kwa siku.

Alisema wamefikia hatua hiyo kutokana na kupanda kwa gharama za maisha mjini Dodoma na kwamba wabunge walianza kupokea posho hiyo mpya Novemba 8, mwaka huu.

Akisisitiza umuhimu wa posho hizo alisema sh.70,000 isingemsaidia mbunge kumudu gharama hata za chumba kwa madai kuwa zimekuwa juu kutokana na mji wa Dodoma kuwa kitovu cha elimu ya vyuo vikuu kwa sasa.

“Kila kitu kimepanda bei na kwa bahati mbaya nyumba zile za CDA (Mamlaka ya Ustawishaji Makao Makuu) zilizokuwa nafuu zilichukuliwa na wabunge wa bunge la tisa kwa mikataba binafsi na wengi hawajazirudisha hadi sasa ili kuwezesha wapya kuzipangisha,” alinukuliwa akisema Spika Makinda akitetea posho hizo juzi.

Mkurugenzi naye awashangaa wabunge

Naye Mkurugenzi wa Taasisi ya Utafiti na Utetezi wa Haki za Ardhi, Bw. Yefred Myenzi, amesikitishwa na kitendo cha Spika Makinda kutete posho hizo na kuwataka wabunge kutambua kuwa hali ngumu ya maisha ipo kwa kila Mtanzania na si kwao pekee.
Akizungumza na Majira Dar es Salaam jana, Bw. Myenzi alisema hali halisi ya Mtanzania hairuhusu mbunge kupandishiwa posho kutoka sh. 70,000 hadi 200,000 kwa siku na kwamba hizo ni anasa .
Alisema wabunge wanavyanzo vingi vya mapato mbali na mishahara yao hivyo hawakustahili kuongezewa posho kiasi hicho huku Watanzania wakizidi kulilia hali ngumu ya maisha.
“Hali hii inaonesha ni kwa jinsi gani wabunge walivyo wabinafsi, wanajali masilahi yao wenyewe na kuacha wananchi wakiumia,” alisema.

Katibu wa Bunge akanusha

Hata hivyo hivi karibuni Katibu wa Bunge, Dkt.Thomas Kashililah, alitoa taarifa kwa vyombo vya habari akikanusha kuwepo kwa nyongeza hiyo.

Katika taarifa hiyo Katibu huyo wa bunge alikiri kuwa wabunge wanataka waongezewe posho za vikao lakini mapendekezo hayo hayajaanza kutekelezwa.

Alisema mapendekezo ya nyongezo hiyo yaliibuka katika mkutano wa wabunge mjini Dodoma, Novemba 8, mwaka huu walipoiomba serikali iangalie upya suala hilo kwa lengo la kuboroshewa.
Dkt. Kashililah alisema serikali ilikuwa haijatoa taarifa iwapo posho hiyo imeongezeka kutoka sh.70,000 hadi 200,000.

Balozi Seif atetea posho Wakati huohuo, Makamu wa Pili wa Rais wa Serikali ya Umoja wa Kitaifa ya Zanzibar, Balozi Seif Ali Iddi, amesema wabunge kuongezwa posho za vikao ni halali kwa kuwa gharama za maisha katika Mkoa wa Dodoma zimepanda.

Alisema ongezeko hilo litalinda heshima za wabunge pindi wanapokuwa wakiendelea na vikao vya bunge.
“Nafikiri siyo heshima kwa mbunge baada ya kumaliza vikao anakwenda kulala kwenye gesti ya sh. 5000 hii ni aibu, ni sawa posho zilivyopandishwa,” alisema.

Alisema anakubaliana na uamuzi wa serikali kuwa ni mzuri na utampa nafasi nzuri mbunge ya kuishi wakati wa vikao.