Chuo Kikuu Dar es salaam kwafukuta tena

Na Grace Ndossa

WANAFUNZI wa Chuo kikuu cha Dar es Salaam  wamegoma kuingia madarasani  kwa muda usiojulikana kushinikiza uongozi wa chuo hicho kurudisha wanafunzi
waliosimamishwa masomo.

Wakizungumza na gazeti hili  Dar es Salaam jana baadhi ya wanafunzi walisema  kuwa mgomo huo utaendelea hadi wanafunzi waliosimamishwa  masomo warudishwe.

Alisema kuwa  Novemba 11 wanafunzi waligoma chuoni hapo kushinikiza wanafunzi wa mwaka wa kwanza wapatiwe mikopo lakini baadhi ya wanafunzi walikamatwa na askari na kupelekwa mahakamani kufunguliwa mashtaka.

Baada ya wanafunzi hao kukamatwa na kufikishwa mahakama ya hakimu mkazi kisutu walifunguliwa kesi ya kufanya mikusanyiko isikuwa halali.

Alisema kuwa baada ya kufunguliwa mashtaka hayo walirudishwa rumande hadi hapo uongozi wa chuo ulipoenda kuwatolea dhamana.

Waliporudi chuoni  wanafunzi 35 walipewa barua za kukaa nyumbani hadi hapo kesi itakapoisha ndipo warudi chuoni.

Wanafunzi wengine 15 wamepewa barua za onyo na wengine 8 wamesimamishwa masomo  kwa muda wa miezi tisa hadi mwakani.

Bw. Mabrika Mawazo ambaye ni mwanafunzi wa mwaka wa pili alisema kuwa, kama wanafunzi hao wamesimamishwa masomo kwa muda wa miezi tisa  wangesimamishwa wanafunzi wote kwani  maandamano yalifanywa na wanafunzo wote.

Pia alisema kuwa maamuzi yaliyotolewa  na chuo hicho  kufukuza wanafunzi hao siyo ya haki bali wangeondolewa wanafunzi wote.

Alisema kuwa hata serikali ya wanafunzi (DARUSO)
imeungana na utawala  kukandamiza wanafunzi hao.

Pia alisema kuwa   Rais Kikwete anatakiwa kutopewa madaraka ya kuchagua makamu Mkuu wa chuo ili kuondoa siasa vyuoni.

"Rais atakiwa kupewa madaraka ya kuchagua  makamu Mkuu wa chuo anatakiwa kuteuliwa na maprofesa wenyewe ili aweze kuwa na nguvu ya  kutoa maamuzi,"alisema Bw. Mawazo.

Naye Bw. Ndunguru Francis ambaye ni mwanafunzi wa mwaka wa tatu amepewa barua ya kufukuzwa chuo kwa muda usiojulikana kutokana na kusababisha mgomo  chuoni hapo.

Alisema kuwa mgomo uliofanyika chuoni hapo ulikuwa ni wa amani na haukuwa ni wa kutisha hadi wanafunzi kupelekwa mahakamani.

"Tunashangaa hapa chuoni  migomo ipo kila leo na mikubwa kushinda hiyo iliyofanya wanafunzi wakamatwe na kupelekwa mahakamani,"alisema Bw. Mrema.

Alisema kuwa yeye binafsi kutokana na barua hiyo aliyopewa ya kukaa nyumbani muda usiojulikana  ataendelea kukaa ndani ya eneo hilo mpaka ajue hatima yake.

"Mimi binafsi sitaondoka chuoni hapa mpaka nijue hatima yangu, sitakula wala kunywa,"alisema Bw.Mrema.

Naye makamu mkuu wa chuo utawala Bw.Yunus Mgasa alisema wanafunzi waliosimamishwa masomo wamefuata taratibu na sheria za chuo.

Aliongeza wanafunzi hao hawatarudishwa chuoni kuendelea na masomo hadi hapo watakapomaliza kesi zao mahakamani na wale wanaodai mikopo tayari mikopo yao imeingizwa katika akaunti zao za benki.