Kuziona African Lyon, Yanga 3,000/-

Na Mwandishi Wetu

CHAMA cha Mpira wa Miguu Mkoa wa Dar es Salaam (DRFA), kwa kushirikiana na Kampuni ya Vannedrick wametangaza viingilio vyakatika mchezo kati ya Yanga na Africa Lyon ambapo cha chini ni sh. 3,000.


Kwa mujibu wa taarifa iliyotolewa jana kwa vyombo vya habari na Mkurugenzi wa kampuni hiyo, Celina Chang'a alisema wamepanga kiwango cha chini ili kuwapa nafasi wadau wengi kuona mchezo huo.

Alisema timu hizo zitacheza siku ya Jumapili kwenye Uwanja wa Taifa, Dar es Salaam ambapo Yanga itawatambulisha wachezaji wao wapya wakiwemo Mbuyu Twite na Didier Kavumbagu.

Mkurugenzi huyo alitaja viingilio vingine kuwa ni sh. 15,000 VIP A, VIP B sh. 10,000, viti vya rangi ya machungwa ni sh. 5,000 na mzunguko sh. 3,000.

African Lyon nao wametamba kucheza kikosi chao kipya wakiwemo watatu waliowasajili kutoka nje ya nchi.