Tunalaani unyama aliofanyiwa Ulimboka

WAKATI Serikali ikiendelea na jitihada za kuupatia ufumbuzi mgomo  madaktari, ili umalizike bila kuathiri zaidi hali ya utoaji huduma katika hospitali zetu, Mwenyekiti wa Jumuiya ya Madaktari nchini, Dkt. Steven Ulimboka, amejeruhiwa vibaya baada ya kutekwa nyara usiku wa kuamkia jana katika mazingira ya kutatanisha, jijini Dar es Salaam.

Tukio hilo la kikatili, linadaiwa kufanywa na watu wasiojulikana, ambao baada ya kufanya unyama huo, walimtelekeza Dkt. Ulimboka katika Msitu wa Mabwepande, nje kidogo ya Jiji la Dar es Salaam.

Taarifa za kutekwa na kushambuliwa kwa Dkt. Ulimboka, zimethibitishwa na Kamanda wa Polisi Kanda Maalumu ya Dar es Salaam, Suleiman Kova, alipozungumza na waandishi.

Kamanda Kova alisema, tayari jalada la upelelezi wa shambulio limefunguliwa kwenye Kituo cha Wazo Hill, lenye namba WH/IR/6707/2012.

Alisema Dkt. Ulimbokwa aliokotwa katika msitu huo na mtu mmoja (bila kumtaja jina), ambaye alimbeba katika gari yake na kumpeleka Kituo cha Polisi Bunju, akizungumza kwa sauti ya chini kutokana na kipigo alichopata kwa watu hao.

Kimsingi tukio hili limetusikitisha na kuungana kwa nguvu zote wanaolaani waliohusika na tukio hilo. Ni wazi kuwa Watanzania wengi wana shauku ya kujua ni nini kilichomsibu Dkt. Ulimboka hatua ambayo itasaidia kuepusha taarifa za upotoshaji ambazo zinaweza kuenezwa wakati huu, iwapo ukweli utachelewa kujulikana.

Kwa msingi huo ni imani yetu kuwa wakati leo Serikali ikiratarajia kutoa msimamo wake juu ya mgomo unaoendelea, itatoa ufafanuzi wa kina kuhusu hatua zitakazochukuliwa kuhakikisha wahusika wa unyama huo, wanakamatwa na kufikishwa katika vyombo vya sheria.

Tunaungana na Watanzania wengine kulaani na kukemea vikali unyama wa aina hiyo kwani si sehemu ya utamaduni wa Watanzania. Tunasisitiza hivyo kwani tunafahamu kwamba kwa namna moja kitendo alichofanyiwa Dkt. Ulimboka kinaweza kuchochea mgomo huo.

Kwa msingi huo tunatoa mwito kwa Serikali kuchukua hatua stahiki kuhakikisha waliohusika wanakamatwa na kufikishwa kwenye vyombo vya sheria. Tunahisi Serikali itekeleze hili ikiwa na dhamira kuwa waliomfanyia Dkt. Ulimboka unyama ule walilenga kusiganisha madaktari wetu na Serikali yao.

Ndiyo maana tunatoa mwito kwa Serikali wahuni wote waliohusika na unyama huu wakamatwe ili sheria ichukue mkondo wake.