Chenji ya rada yatua serikalini.

 Na Mwandishi Wetu
*Ni bil.80, Mkulo azitolea ufafanuzi

 HATIMAYE Serikali ya Uingereza imetimiza ahadi ya kuirudishia Tanzania Paundi milioni 29.5 sawa na sh.bilioni 80 za kitanzania
kama malipo ya ziada yaliyotolewa kinyume cha utaratibu kwa kampuni inayouza vifaa vya kijeshi ya BAE Systems katika manunuzi ya rada.

Tayari Serikali imeelekeza fedha hizo zipelekwe katika sekta ya elimu ambayo inakabiliwa na changamoto kubwa kama ukosefu wa nyumba za walimu, maabara na vifaa vyake, madarasa, vitabu na walimu wa kutosha.

Waziri wa Fedha, Bw. Mustafa Mkulo, aliyasema hayo Dar es Salaam jana wakati akijibu maswali ya waandishi wa habari ofisini kwake waliotaka kujua hatua iliyofikiwa na Serikali katika kudai fedha hizo.

Bw.Mkulo alitoa ufafanuzi huo baada ya kupokea msaada wa sh. bilioni 3.2 zilizotolewa na Serikali ya Japan kwa Tanzania kwa ajili ya kuboresha utendaji kazi wa Serikali za Mitaa nchini.

“Ninachopenda kusema ni kwamba, tayari fedha za rada zimetolewa na Serikali ya Uingereza ila tunasubiri kukaa kikao ili tujue katika sekta hiyo ya elimu zinatumika vipi.

“Tumeichagua sekta hii kwa sababu inakabiliwa na changamoto nyingi na wananchi wamekuwa wakiilalamikia sana sasa ili wajue kuwa fedha hizi zimelipwa ni vyema tukaziweka katika elimu ili iweze kunufaisha wananchi,” alisema Bw.Mkulo.

Aliongeza kuwa, kikao cha kuamua maeneo ambayo fedha hizo zitaelekezwa katika sekta hiyo, kitahusisha Wizara ya Fedha, Mambo ya Nchi za Nje na Ushirikiano wa Kimataifa, Ubalozi wa Uingereza na Wizara ya Elimu yenyewe.

“Lengo lingine la kupeleka fedha hizi katika elimu ni kutaka wananchi watambue kuwa, tayari tumelipwa fedha hizi na zitatumika katika shughuli za maendeleo ya nchi.

“Matumizi ya fedha hizi yatamaliza taarifa za uzushi za kuwepo kwa vitendo vya rushwa,” alisema.

Sakata la malipo ya fedha za rada zilizolipwa kwa kampuni hiyo, zimekuwa gumzo kwa makundi mbalimbali ya watu nchini baada ya kugundulika kuwa, kampuni hiyo iliitoza Tanzania bei kubwa zaidi ya ile iliyotakiwa.

Bunge la Uingereza limekuwa mstari wa mbele kuitetea Tanzania ili iweze kurudishiwa fedha hizo na kupendekeza Serikali ya nchi hiyo kuitoza faini kwa kitendo cha kuinyonya nchi maskini kama Tanzania na kuagiza kurejeshwa kwa fedha hizo.

Hivi karibuni, Bunge hilo lilipendekeza wahusika wote waliofanikisha Tanzania kulipa fedha nyingi kuliko bei halisi ya rada, wachukuliwe hatua bila kuachwa.

Kampuni ya BAE iliiuzia Tanzania rada hiyo kwa dola za Marekani milioni 40 (sh. bilioni 54), hatua iliyopingwa na wengi, akiwamo aliyekuwa Waziri wa Uingereza wa Masuala ya Afrika, Bw.Clear Shot,  pamoja na taasisi mbalimbali ikiwamo Benki ya Dunia (WB).