Majambazi yapora mil.15/- yatumia bunduki, mabomu

Na Faida Muyomba, Chato

KUNDI la watu zaidi ya 10 wenye silaha wamevamia duka la Wakala wa Kampuni ya simu ya Vodacom wilayani Chato, mkoani Kagera na kupora zaidi ya
sh. milioni 15 pamoja na vocha.

Kaimu Kamanda wa Polisi Mkoa wa Kagera, Bw. Vitus Mlolele, akizungumzia kwa njia ya simu na Majira, alisema tukio hilo lilitokea saa nane usiku wa kuamkia jana.

Alisema, kundi hilo, lilitumia baruti kuvunja duka hilo linalomikiwa na  mtu aliyetambuliwa kwa jina la Bw. Majura."Majambazi hayo yalitumia baruti kuvunja mlango wa duka hilo kisha kuingia na kufanikiwa kupora fedha taslimu sh. milioni 15 pamoja na vocha mbalimbali ambazo thamani yake bado haijajulikana,’’ alisema

Alisema, jeshi hilo bado linaendelea  na upelelezi wa kina kuwasaka watu hao na kwamba hakuna mtu aliyeuawa katika tukio hilo.

Habari zilizopatikana kutoka wilayani humo, zinasema kundi hilo la majambazi kabla ya kufanya uporaji huo, yalifyatua risasi kadhaa angani pamoja na kutupa mabomu ya mkono hali iliyozua hofu kwa wakazi wa mji huo.

Mashuhuda wa tukio hilo walisema  watu hao walivunja duka hilo ambalo licha ya kuuza vocha za simu pia lilikuwa likitumika kutoa huduma ya M-Pesa kwa wateja wake.

Mkuu wa Wilaya ya Chato, Bi.Hadija Nyembo, alisema kuwa tukio hilo limewashtua na kwamba ameitisha kikao cha dharura cha Kamati ya Ulinzi na Usalama wilayani humo.

"Ni tukio ambalo limetushtua mno na mimi kama Mwenyekiti wa Kamati ya Ulinzi na Usalama Wilaya ya Chato, nimehitisha kikao maalum ili tujadili kwa kina namna tutakavyopambana na hali hii ya uhalifu ambao unaonekana kutisha," alisema.