CCM: Wanaoponda maendeleo yetu wana macho lakini hawaoni

Na Esther Macha, Mbeya

CHAMA Cha Mapinduzi (CCM), mkoani Mbeya, kimesema wanasiasa kutoka vyama vya upinzani wanaodai chama hicho
hakijafanya maendeleo wana macho lakini wanashindwa kuona.

Mwenyekiti wa CCM mkoani humo, Bw. Godfrey Zambi, ambaye pia ni Mbunge wa Mbozi Mashariki, aliyasema hayo katika kilele cha sherehe za miaka 36 ya kuzaliwa kwa chama hicho katika
Kata ya Totowe, wilayani Chunya.

Alisema wanasiasa hao wanatembea katika barabara za lami zilizojengwa na CCM lakini bado wanasema haijafanya kitu
na kusisitiza kuwa, upinzani unapata nguvu ya kutoa madai
hayo kwa sababu watendaji wa chama hawafiki kwa
wananchi ili kujua kero zao na kuainisha mafanikio.

“Watendaji wote wa Serikali wana jukumu kubwa la kuwafikia wananchi ili kujua kero zinazowakabili badala ya kukaa ofisini
na kuwaeleza mafanikio ya chama chao,” alisema.

Bw. Zambi aliongeza kuwa,baadhi ya mafanikio yaliyopatikana tangu kuzaliwa kwa chama hicho ni pamoja na uwepo wa shule
za sekondari kila kata nchini, ujenzi wa barabara za lami, vituo
vya afya, zahanati na ukuaji wa uchumi.